Armaniston bosh vaziri Nikol Pashinyan 28-noyabr kuni Ostona shahrida bo‘lib o‘tadigan Kollektiv xavfsizlik shartnomasi tashkiloti (KXSHT) sammitida ishtirok etishdan bosh tortdi. Bu haqda “Rossiyskaya gazeta” xabar berdi.
Pashinyanning matbuot kotibi Nazeli Bagdasaryanga ko‘ra, “Armaniston Respublikasining KXSHT faoliyatidagi ishtirokini muzlatish bo‘yicha pozitsiyasi o‘zgarmadi”. Armaniston tashqi ishlar vaziri Ararat Mirzoyan ham sammitga bormaslikka qaror qilgan.
Pashinyan 2024-yil fevralida Yerevanning KXSHTdagi ishtirokini muzlatish haqida bildirgandi. U mamlakatning birlashmaga a’zoligi davom etishi, ammo u muzlatilishini ma’lum qildi. Pashinyanning fikricha, tashkilot 2020-yilda Tog‘li Qorabog‘dagi mojaroning keskinlashuvi munosabati bilan o‘z majburiyatlarini bajarmagan.
27-noyabrda, Belarus prezidenti Aleksandr Lukashenko KXSHT sammitida qatnashish uchun Ostonaga yetib keldi. Undan oldinroq Rossiya prezidenti Vladimir Putin Qozog‘iston poytaxtiga uchib kelgandi. 28-noyabr kuni esa Qirg‘iziston prezidenti Sadir Japarov va Tojikiston prezidenti Emomali Rahmonning tashrifi amalga oshdi.
KXSHT sammitida ishtirokchi mamlakatlar delegatsiyalari mintaqaviy va xalqaro xavfsizlikning dolzarb masalalarini muhokama qiladi. Yig‘ilish yakunida bir qator hujjatlar qabul qilinadi.
Armaniston va Kollektiv xavfsizlik shartnomasi tashkiloti munosabatlari
2023-yil yanvar oyida Armanistonda KXSHT mashg‘ulotlari bekor qilingan. Shundan so‘ng ular Qirg‘izistonda amalga oshirilgan. O‘tgan yilning noyabr oyida Minskda tashkilotning sammiti bo‘lib o‘tgan, unda arman vakillaridan hech biri ishtirok etmagan. Bosh kotib Imangali Tasmagambetov Armaniston tashkilotdan chiqish niyatida emasligini aytgan.
Armaniston bosh vaziri Nikol Pashinyan KXSHTdan chiqish haqida gap yo‘qligiga ishontirgan, biroq u mamlakat yangi hamkorlar izlayotganini ham ta’kidlagan. 22-fevral kuni Pashinyan o‘z mamlakatining KXSHTdagi ishtiroki muzlatilganini e’lon qildi. Shu yilning iyun oyida Armaniston tashkilotdan chiqishi mumkinligi ma’lum bo‘ldi.
Izoh (0)