Seulga tashrifi chog‘ida Ukraina delegatsiyasi Janubiy Koreyadan unga havo hujumiga qarshi mudofaa tizimini sotishni so‘ramagan. Bu haqda Koreya Respublikasi mudofaa vaziri Kim Yon Xyon xabar berdi.
“Men delegatsiyadan Chxongun havo mudofaa tizimini sotib olish bo‘yicha hech qanday taklif olmadim”, dedi vazir ukrainalik hamkasbi bilan 30 daqiqalik suhbat haqida gapirar ekan.
Kim Yon Xyonning so‘zlariga ko‘ra, Ukraina delegatsiyasi KXDR Rossiyaga “Xvason” qisqa masofali ballistik raketalari va 240 mm ko‘p uchiruvchi raketa tizimlari kabi qurol-yarog‘lar yetkazib bergan, deb hisoblaydi. O‘z navbatida, Moskva Pxenyanga zenit raketalarini topshirgan.
Ukraina mudofaa vaziri Rustem Umerov boshchiligidagi delegatsiya Janubiy Koreya prezidenti bilan uchrashish uchun Seulga tashrif buyurgani haqida xabar berilgan edi.
SBS mahalliy telekanaliga ko‘ra, Ukraina tomoni Koreyadan qurol-yarog‘, jumladan, Chxongun o‘rta masofaga mo‘ljallangan “yer-havo” raketalari, artilleriyaga qarshi radarlar va 155 millimetrli o‘q-dorilarni sotib olish istagini bildirgan.
Telekanal Janubiy Koreya Ukrainaga hatto pul evaziga ham qurol yetkazib berishdan bosh tortganini qayd etgan.
Seulning ta’kidlashicha, urush zonalariga qurol sotish uning qonunlarini buzadi va 2030-yilga qadar boshqa davlatlarni ta’minlash uchun yetarli ishlab chiqarish va ta’minotga ega emas.
Biroq, SBS’ning ma’lum qilishicha, rad etish sababi urushni tugatishga va’da bergan Trampning prezidentlikka saylangani bilan aloqador bo‘lishi mumkin va shuning uchun “AQSH saylangan prezidenti bilan hamqadam bo‘lmasdan Ukrainaga yordam berish oson bo‘lmaydi”.
Tashrif yakunida Umerovning o‘zi Seulni Shimoliy Koreya harbiylarining urushda Rossiya tomonida ishtirok etayotgani haqida xabardor qilganini aytgan.
“Biz Ukraina va Koreya Respublikasi o‘rtasidagi hamkorlikni oshirish zarurligi haqidagi dalillarimiz xalqlarimiz va mintaqalarimiz xavfsizligini sezilarli darajada mustahkamlashga olib keladi, deb hisoblaymiz”, deydi Umerov.
Izoh (0)