Jahon avtomobil sanoatida noyob hisoblangan, oq rangdagi yagona Ferrari 250 GTO Bianco Special modeli AQShning Florida shtatida o‘tkaziladigan Mecum auksioniga qo‘yildi, deb xabar bermoqda Auto.ru.
Shassi raqami 3729GT bo‘lgan ushbu model nafaqat o‘zining tarixiy qiymati, balki qator jihatlariga ko‘ra kolleksionerlar va avtomobil ishqibozlari e’tiborini o‘ziga tortmoqda.
Birinchi o‘ziga xos jihat — bu Ferrari 250 GTO modeli dunyodagi yagona zavoddan oq rangda chiqqan nusxa ekanligi. Maranello shahridagi Ferrari zavodida aynan ushbu avtomobil Bianco Speciale rangi — marvarid tusli oq rangga bo‘yalgan.
Ikkinchidan, aynan shu mashinani britaniyalik ikki karra Formula-1 chempioni Grem Xill haydab, Gudvuddagi poygada ikkinchi o‘rinni egallagan.
Uchinchi e’tiborga molik omil bu avtomobil Gran Turismo 6 videoo‘yinida raqamli nusxasi sifatida paydo bo‘lganidir. Keyinchalik u Gran Turismo Sport va Gran Turismo 7 o‘yinlarida ham chiqqan, biroq bu gal modelning shassi raqami ko‘rsatilmagan.
Ta’kidlash joizki, 1962–1964 yillar oralig‘ida atigi 36 dona Ferrari 250 GTO ishlab chiqarilgan. Ular orasida oq rangli model yagona bo‘lib, bu turdagi avtomobillar bozorda juda kamyob va narxi nihoyatda qimmat turadi.
Oxirgi marta Ferrari 250 GTO 4,0 V12 dvigatelli modeli 2023-yil noyabrida Sotheby’s auksionida rekord narx — 51,7 million dollar evaziga sotilgan edi. Bungacha ham eng qimmat narx aynan 250 GTO modeliga tegishli bo‘lgan: 2018-yilda ushbu avtomobil 48,4 million dollarga xarid qilingan.
Auksion lotining narxi esa hozircha oshkor etilmagan.
Izoh (0)