Universal Pictures kino kompaniyasi xonanda Britni Spirsning “Mendagi ayol” (“The woman in me”) hayot xotiralari haqidagi kitobi asosida film suratga olish huquqini qo‘lga kiritdi.
2023-yil 24-oktyabrda chop etilgan “Mendagi ayol” kitobi bir zumda o‘quvchilar va tanqidchilarning olqishiga sazovor bo‘ldi va bestseller asarga aylandi. Kitob birgina Qo‘shma Shtatlarda 2,5 million nusxadan ko‘proq sotildi. Ushbu memuar asosida film yaratish uchun yirik kino kompaniyalar orasida katta raqobat bo‘lib o‘tdi va natijada Universal Pictures kitobni ekranlashtirish huquqini sotib oldi.
Biografik film rejissyori Jon Chu, prodyuseri Mark Platt bo‘lib, u “La La Lend”, “Vavilon” kabi filmlari bilan tanilgan. Spirs X tarmog‘ida (sobiq Twitter) xonandaning eng yaxshi ko‘rgan filmlari muallifi Platt bilan yangi va sirli loyiha” ustida ishlayotganini ma’lum qilgan edi.
Britni Spirs kitobida hayotida bo‘lib o‘tgan og‘ir damlar va achchiq xotiralari haqida ochiq-oydin so‘zlab bergan edi. Asarda pop yulduzning oilasi, shaxsiy hayoti, ziddiyatli o‘tgan bolaligi, Jastin Timberleyk bilan munosabatlari va uning bosimi ostida 19 yoshida abort qildirishga majbur bo‘lgani, Kevin Federlayn bilan nikohi, otasining vasiyligi uchun kurashishi kabi ko‘plab voqealar yoritilgan. Shuningdek, o‘quvchi asar orqali shou-biznesdagi karyeraning turli qirralari va sahna ortidagi hayotga boshqa tomondan qarash imkoniyatiga ega bo‘ladi.
Izoh (0)