Los-Anjeles Oliy sudida amerikalik pop-yulduz Britni Spirs va uning otasi Jeymi Spirs o‘rtasidagi vasiylik ishi bo‘yicha bo‘lib o‘tgan huquqiy bahslar o‘z nihoyasiga yetdi. Bu haqda “Pravila jizni” nashri xabar bermoqda. Sudda advokatlar ish haqini to‘lash va xonandani otasi tomondan moliyaviy boshqarish masalasi ko‘rib chiqildi.
Britni Spirs advokati Metyu Rozengartning aytishicha, xonanda va nihoyat to‘liq erkinlikka erishdi. Endilikda pop-yulduz orzu qilganidek vasiylik va moliyaviy erkinlik masalalari bo‘yicha huquqiy muammolarga duch kelmaydi.
Spirs xonim har doim ilhom beruvchi yulduz va o‘ziga xos epik tarixga ega jasur xonanda bo‘lib qoladi. Vasiylik 2021-yil noyabr oyida olib tashlanganiga qaramay, uning ozodlikka bo‘lgan istagi aynan bugun to‘liq amalga oshdi, — deydi uning advokati.
The New York Times qayd etishicha, ota va farzand o‘rtasidagi nizoni hal etish shartlari ma’lum qilinmagan. Biroq TMZ nashri ma’lumotlariga ko‘ra, Britni Spirs sud ishida mag‘lub bo‘ldi va endilikda u sud xarajatlarini to‘lashga majbur. Manbalarga ko‘ra, qo‘shiqchi nafaqat o‘z pullarini qaytara olmaydi, buning ustiga otasi Jeymining 2 million dollardan ortiq sud to‘lovlarini ham qoplashga majbur bo‘ladi.
Bo‘lib o‘tgan ishlardan Britni albatta o‘ta g‘azablangan, chunki mazkur sudda yutib chiqish uchun xonanda o‘z advokatiga taxminan 4 million dollar sarflagan. Afsuski, Britnining otasi bundan avval yillar davomida vasiy sifatidagi vakolatlarini suiiste’mol qilgan.
Ma’lumot uchun: Britni Spirs 2008-yilda uning ruhiy salomatligi bilan bog‘liq ommaviy janjallardan keyin otasining vasiyligiga olingan. Jeymi Spirs qizi hayotining deyarli barcha sohalarini nazorat qilgan. 2020-yilda qo‘shiqchi vasiylikka qarshi chiqishga harakat qildi va avgust oyida Jeymi Spirs qizining vasiylik huquqini bekor qilishga rozi bo‘ldi. 2021-yil 12-noyabrda Los-Anjelesdagi sud nihoyat Jeymi Spirsni 13 yil davom etgan vasiylikdan olib tashladi.
Izoh (0)