Britni Spirs turmush qurganidan 14 oy o‘tib ajrashayotganini ma’lum qildi, deb yozmoqda “Pravila jizni” nashri.
Ma’lum bo‘lishicha, Sem Asgari Britniga ajrashishni taklif qilgan, u xonandani xiyonatda ayblagan. Bundan tashqari, u rafiqasining ayrim xatti-harakatlariga chidashdan charchagan, deb ta’kidlaydi tabloid.
Asgari allaqachon xonanda bilan birga yashagan uyidan boshqa joyga ko‘chib o‘tgan. O‘z navbatida, Spirs ham ajrashish bilan bog‘liq ishlar bilan shug‘ullanish uchun “orzusidagi yuristlar” jamoasini yollagan, deb yozmoqda Variety nashri. Hozircha juftlik ajrashayotgani haqidagi xabarga izoh bermagan.
Ma’lumot uchun, Asgari — fitnes-trener, model va aktyor. U Spirs bilan 2016-yilda Slumber Party klipining suratga olish maydonchasida tanishgan. Shundan keyin ko‘p o‘tmay ularning munosabatlari ommaga oshkor bo‘lgan. Pop qo‘shiqchi va fitnes-murabbiy o‘rtasidagi munosabatlar qariyb besh yildan buyon davom etib kelayotgandi.
Ular 2022-yilning 9-iyun sanasida qo‘shiqchining Thousand Oaks nomli uyida ko‘plab guvohlar qarshisida nikoh uzuklarini almashgan edi.
To‘yga taklif etilgan mehmonlar orasida Britnining onasi Linn Spirs, otasi Jeyms Spirs va singlisi Jeymi Linn Spirs bo‘lmagan (faqat ukasi Brayan taklif etilgan). Marosimda Madonna, Dryu Berrimor, Peris Xilton, Selena Gomes va qo‘shiqchining kelin ko‘ylagi muallifi Donatella Versache ishtirok etgan.
Juftlik 2021-yilning sentabr oyida, Britni otasining 13 yillik vasiyligidan qutulganidan so‘ng unashtirilgan edi. Spirs muxlislarini o‘z rejalari haqida ijtimoiy tarmoqlar orqali xabardor qilib borgan. Shundan keyin u Asgari bilan Kabo, Kankun, Las-Vegas va Gavaida hordiq chiqarib kelgan.
Ta’kidlash kerakki, bu hozirda 40 yoshni qarshilagan pop-qo‘shiqchining uchinchi marta oila qurishi hisoblanadi. 2004-yilda u bolalikdagi do‘sti Jeyson Aleksandrga turmushga chiqqandi. Biroq 55 soat davom etgan nikoh bekor qilingan va qo‘shiqchi “ahmoqlik qilib qo‘yganini” tan olgan.
Bir necha oy o‘tib, u Gollivuddagi Joseph klubida tanishib qolgan o‘yinchi Kevin Federlaynga turmushga chiqqan. Ular 2007-yilga qadar birga yashab, ikki nafar farzandni tarbiyalagan.
Izoh (0)