Farzandning dunyoga kelishi quvonchli hodisa. Afsuski, ba’zi oilalar bunday quvonch zavqini tuyushni istamaydi, ayrimlari esa uning kelishini yillab kutishadi. O‘zbek san’atkorlari orasida ham farzandli bo‘lishni uzoq yil kutganlar bisyor.
Umida Norboyeva
“Iskanja” va “Dengiz guli” seriallaridagi ishtiroki bilan tomoshabinlarga yaxshi tanish bo‘lgan aktrisa Umida Norboyeva ham 12 yil deganda homilador bo‘ldi. U Instagram sahifasiga video joylab, quvonchli xabarni kuzatuvchilari bilan bo‘lishdi.
— Kimdir befarzand ekanligimni biladi, kimlardir yo‘q. Ammo men homilador bo‘lishni 12 yil kutdim. “Qachon homilador bo‘lar ekanman? Bu baxt menga nasib etadimi?” deb ko‘p o‘ylardim. Shukrki, 12 yilda bo‘lsa-da, bu baxt nasib etdi, — deydi aktrisa Umida Norboyeva.
Nargiz Yandasheva
Xonanda Nargiz Yandasheva ham 12 yil deganda farzandli bo‘lgan. U farzandli bo‘lishdan butkul umidini uzgani va ba’zi hamkasblaridan ranjigan kunlarni quyidagicha eslaydi.
— Ona bo‘lgach, eski xotiralarning barini unutib yubordim. Ammo farzandsizlikdan qiynalayotgan ayollarga umid berish uchun ularni eslab turaman. 12 yil davomida homilador bo‘lishga harakat qilganman. Ko‘rinmagan shifokorim, tabibim qolmagan. Hatto o‘zbek shifokorlariga ishonmay ham qo‘ygandim. Ba’zi hamkasblarimning “Voy, hali ham tug‘madingizmi?”, “Bolangiz yo‘q-ku, bizdan keyin sahnaga chiqsangiz ham bo‘ladi?” kabi gap-so‘zlari yuragimga xanjardek sanchilardi. Turmush o‘rtog‘imga ajrashishni yoki boshqa ayolga uylanishni ham taklif qilganman. Homilador ekanligimni eshitganimda hayotim tubdan o‘zgarib ketdi. Farzand haqiqatan ham oilaga baraka, fayz va mehr olib kirarkan, — deydi xonanda Nargiz.
Feruza Sobitova
Kino va teatr aktrisasi Feruza Sobitova 9 yil farzandsizlik azobini boshidan kechirgan. Birinchi turmushidan ajrashishiga ham farzand ko‘rolmagani sabab bo‘lgan.
— O‘g‘lim Imronni 38 yoshimda dunyoga keltirganman. To‘qqiz yil farzandsizlik azobini chekkanman. “Opa-singillar” serialining tug‘uruqxonada tasvirga olinadigan sahnasida rejissor Zamira Begimqulova “Feruza, bu yer chillaxona, yaxshi niyatlar qilavering. Xudo yetkazadi”, deb ko‘p aytgandi. Qo‘limga chaqaloqlarni olib, menga ham bir kuni o‘z bolamni bag‘rimga bosish nasib etsin, deb niyat qilgandim. Ming bor shukr, Alloh nolalarimni eshitib, 2013-yil o‘g‘il farzand ato etdi. Yashirmayman, birinchi turmushimning buzilishiga qaysidir ma’noda farzand ko‘rmaganim sabab bo‘lgan. Sobiq turmush o‘rtog‘im tadbirkor inson edi. U yaxshi inson bo‘lgani uchun dadam rahmatli u bilan ajrashishimni istamagandi. Ajrashayotgan vaqtimda ham “Iltimos, ajrashma”, degan. Men esa “Yo‘q, dada, men yashay olmayman, turmush qurishimni istadingiz, mana turmush qurdim, u inson meni xohlamayotgan bo‘lsa, qanday qilib yashayman, o‘zimni past pog‘onada his qilishni istamayman”, deganman. Shukrki, yana oila qurdim va o‘g‘lim Imronbek dunyoga keldi, — deydi aktrisa Feruza Sobitova.
Nargiza Ro‘ziboyeva
“Opa-singillar” serialidagi roli bilan tomoshabinlarga yaxshi tanish bo‘lgan aktrisa Nargiza Ro‘ziboyeva bir muddat farzandsizlik azobini tortgan.
— O‘g‘lim Yasinbekni to‘rt yil kutganmiz. Albatta, bu jarayonda odamlarning gap-so‘zlariga chidash juda qiyin. “Qachon yangilik bo‘ladi?” degan gapni to‘g‘ri ma’noda aytishsa ham, odamga yomon ta’sir qiladi. Bu jarayonni boshidan o‘tkazayotgan ayollarga bu haqida kamroq o‘ylashni va ko‘proq chalg‘ishga harakat qilishlarini maslahat beraman. Chunki muammoni odamning o‘zi kattalashtiradi, ruhiy siqilish farzandli bo‘lishga foyda bermaydi. Ishlash kerak yoki uyda o‘tirib bo‘lsa-da, yangi hunarlarni o‘rganish kerak. Tushkunlikka tushishingizga sababchi bo‘ladigan insonlardan esa uzoqroq yurish kerak, — deydi Nargiza Ro‘ziboyeva.
Bahora Arslonova
Ayni kunlarda aktrisa Bahora Arslonova ikki farzandini parvarishlash bilan band. Ammo u ham bir muddat homilador bo‘lolmagani uchun ruhiy tushkunlikka tushib qolgani haqida so‘zlab berdi.
— To‘yimdan keyin ikki yil homilador bo‘lolmaganman. To‘g‘ri, bu juda qisqa muddat. Ammo o‘zbekchilikda bilasiz, darrov vahima qilishadi. Turmush o‘rtog‘im tushkunlikka tushib qolsam koyib berardi. “Allohga ham xush kelmaydi, 10 yildan buyon farzandli bo‘lishni kutayotganlar bor”, derdi. Homilador bo‘lganimni bilganimda juda quvonganman. Keyin qizim yoshiga to‘lmay, o‘g‘illi bo‘lishim ham ma’lum bo‘ldi. Aytmoqchimanki, sabr qilgan insonga, albatta, yaratgan egam tuhfa hadya etadi. Faqatgina biroz sinovlarga chidash kerak, xolos, — deydi aktrisa Bahora Arslonova.
Mavzuga doir:
- 35 yoshdan keyin onalik baxtiga sazovor bo‘lgan o‘zbekistonlik mashhurlar (video)
- Britni Spirs, Mariya Sharapova va 35 yoshdan keyin ona bo‘lishga qaror qilgan boshqa mashhur ayollar (foto)
- Hechdan ko‘ra kech: 40 yoshdan keyin ona bo‘lgan Gollivud yulduzlari
- Onalik baxtini his qilish uchun turli qiyinchiliklardan o‘tgan mashhur ayollar (foto)
Izoh (0)