Xitoyning Xunan provinsiyasida taxminan 1000 metrik tonna qimmatbaho metallni o‘z ichiga olgan yuqori sifatli oltin koni topildi.
Taxminan 600 milliard yuan yoki 83 milliard dollarga baholangan bu kashfiyotni hozirgacha topilgan eng yirik va eng foydali oltin koni deb hisoblash mumkin. Konlar allaqachon ma’lum bo‘lgan Vangu koni ostidan topilgan. Xunan geologik xizmati tadqiqotchilari burg‘ulash va 3D modellashtirishdan foydalangan holda, ilgari ma’lum bo‘lmagan konlarni aniqladi. Qayd etilishicha, ular 3000 metr chuqurlikda joylashgan.
Dastlabki ma’lumotlarga ko‘ra, oltin konsentratsiyasi har tonna rudada 138 grammga yetadi, bu yuqori ko‘rsatkich hisoblanadi. Agar bu ma’lumotlar tasdiqlansa, yangi topilma hozirgi rekordchi — Janubiy Afrikadagi 930 tonnaga yaqin qimmatbaho metallni o‘z ichiga olgan South Deep konini ortda qoldiradi.
Xitoy allaqachon jahon oltin bozorida hukmronlik qilmoqda. Mamlakat zaxiralari 2024-yilning boshida 2000 tonnadan oshdi va uning tog‘-kon sanoati jahon ishlab chiqarishining qariyb 10 foizini ta’minlaydi.
“Topilmalarning e’lon qilinishi oltinning allaqachon oshib borayotgan narxini yanada oshirdi, chunki global noaniqlik sharoitida resursga talab o‘sishda davom etmoqda”, deyiladi xabarda.
Izoh (0)