Хитойнинг Хунан провинциясида тахминан 1000 метрик тонна қимматбаҳо металлни ўз ичига олган юқори сифатли олтин кони топилди.
Тахминан 600 миллиард юан ёки 83 миллиард долларга баҳоланган бу кашфиётни ҳозиргача топилган энг йирик ва энг фойдали олтин кони деб ҳисоблаш мумкин. Конлар аллақачон маълум бўлган Вангу кони остидан топилган. Хунан геологик хизмати тадқиқотчилари бурғулаш ва 3D моделлаштиришдан фойдаланган ҳолда, илгари маълум бўлмаган конларни аниқлади. Қайд этилишича, улар 3000 метр чуқурликда жойлашган.
Дастлабки маълумотларга кўра, олтин концентрацияси ҳар тонна рудада 138 граммга етади, бу юқори кўрсаткич ҳисобланади. Агар бу маълумотлар тасдиқланса, янги топилма ҳозирги рекордчи — Жанубий Африкадаги 930 тоннага яқин қимматбаҳо металлни ўз ичига олган South Deep конини ортда қолдиради.
Хитой аллақачон жаҳон олтин бозорида ҳукмронлик қилмоқда. Мамлакат захиралари 2024 йилнинг бошида 2000 тоннадан ошди ва унинг тоғ-кон саноати жаҳон ишлаб чиқаришининг қарийб 10 фоизини таъминлайди.
“Топилмаларнинг эълон қилиниши олтиннинг аллақачон ошиб бораётган нархини янада оширди, чунки глобал ноаниқлик шароитида ресурсга талаб ўсишда давом этмоқда”, дейилади хабарда.
Изоҳ (0)