Eron Atom energiyasi bo‘yicha Xalqaro agentlikni (MAGATE) Fordo va Natansdagi boyitilgan uran zavodlarida 6000 dan ortiq yangi sentrifuga o‘rnatish va u yerda mavjud bo‘lgan ko‘proq sentrifugalarni ishga tushirish rejalari haqida xabardor qildi.
MAGATE hisobotida Tehron xalqaro agentlik boshqaruvchilar kengashining Eron yadro dasturini tanqid qiluvchi yaqinda qabul qilgan rezolyutsiyasiga javoban minglab qo‘shimcha sentrifugalardan foydalanishni boshlashini aytganida aynan nimani nazarda tutgani haqida tushuncha berilgan.
Ayni paytda, hisobotda aytilishicha, uranni boyitish darajasi Eron yadro sanoatini rivojlantirish rejasida ko‘rsatilgan 60 foizdan oshmaydi. “Kommersant” nashrining eslatishicha, Eronda oxirgi marta uranni boyitish uchun ilg‘or sentrifugalar 24-noyabr kuni ishga tushirilgan.
AFP’ga ko‘ra, Jenevada 29-noyabr kuni Eron rasmiylari va Germaniya, Buyuk Britaniya va Fransiya vakillari o‘rtasida Tehron yadroviy dasturi bo‘yicha muzokaralar boshlanadi. Ushbu muzokaralarda Yevropa ittifoqi vakili Enrike Mora ham vositachi sifatida ishtirok etishi kutilmoqda. Rossiya, AQSH va Xitoy uchrashuvda qatnashmaydi. Muzokaralarda Erondan diplomatlar Majid Taxt-Ravonchi, Abbos Araqchi ishtirok etadi.
MAGATE rezolyutsiyasi Eronni tanqid qildi
21-noyabr kuni MAGATE Boshqaruvchilar kengashi rezolyutsiya qabul qildi, unga ko‘ra tashkilot rahbari Rafael Grossi 2025-yil bahorigacha Eron yadro dasturi atrofidagi vaziyat bo‘yicha hisobot tayyorlashi kerak. OAV xabarlariga ko‘ra, hujjat 2019 va 2020-yillarda aniqlangan deklaratsiya qilinmagan obyektlarda tushuntirilmagan uran izlari mavjudligi kabi masalalarni ko‘rib chiqadi.
Bundan tashqari, rezolyutsiyada Eron MAGATE bilan hamkorlik qilmayotgani uchun qoralanadi va agentlikni Islom Respublikasining yadroviy faoliyati haqida keng qamrovli hisobot chop etishga chaqiradi.
Rezolyutsiya Germaniya, Fransiya, Buyuk Britaniya va AQSH tomonidan tayyorlangan. Ovoz berish natijalariga ko‘ra, hujjat MAGATE Boshqaruvchilar kengashiga a’zo 19 davlat tomonidan qo‘llab-quvvatlandi. Yana 12 davlat betaraf qoldi. Rossiya, Xitoy va Burkina-Faso rezolyutsiyani rad etdi.
Eron TIV MAGATE tomonidan Tehronni tanqid qiluvchi rezolyutsiya qabul qilinishiga javoban, Eron endi uranni tezlashtirilgan boyitish uchun yangi, zamonaviy sentrifugalardan foydalanishni boshlaydi. Eron Tashqi ishlar vazirligi va Eron Atom energiyasi tashkiloti qo‘shma bayonotida MAGATE rezolyutsiyasi “siyosiy maqsadli va buzg‘unchi” va Eronga qarshi qaratilgan “siyosiy noqonuniy maqsadlarga erishish uchun ishlab chiqilgan” deb nomlandi.
Izoh (0)