Davlat aktivlarini boshqarish agentligi Toshkentdagi International va Lotte City Hotel Tashkent Palace mehmonxonalari sotilganini e’lon qildi.
Ma’lum qilinishicha, poytaxtning Yunusobod tumanida joylashgan International mehmonxonasini sotib olish bo‘yicha qiziqish to‘g‘risidagi arizalar Arab, Sharqiy Osiyo va Yevropa davlatlaridagi 6 nafar xalqaro hamda mahalliy investorlar tomonidan kelib tushdi.
Ushbu mehmonxonani sotib olish uchun eng yuqori narx taklifini bildirgan Smart Fast Stroy MCHJ 26 mln AQSH dollari miqdorida sotib olish to‘lovini to‘lash sharti bilan savdo g‘olibi deb topildi.
Shu bilan birga, investor InterHotel MCHJdagi 100 foiz davlat ulushini 26 mln AQSH dollariga sotib olish bilan birga jamiyatning tegishli bank oldidagi 14,7 mln yevro miqdoridagi kredit qarzdorligini ham qabul qilmoqda. Investor tomonidan bitim doirasida 41 mln AQSH dollaridan ko‘p mablag‘ yo‘naltiriladi.
International mehmonxonasi 2024-yilning may oyida sotuvga qo‘yilgandi. Mehmonxona 232 ta xona, 7 ta konferens zal, 2 ta restoran, barlar, yozgi terrasa, fitnes-klub va basseynni o‘z ichiga oladi. Umumiy 3 gektar yer maydonida 44,903 kvadrat metr bino va inshootlar joylashgan.
2024-yil 19-aprelda qabul qilingan prezident qaroriga ko‘ra, 7 ta yirik kompaniyadagi, shu jumladan, InterHotel MCHJdagi davlat ulushlari professional konsultantlarni jalb qilgan holda, 2025-yilning oxirigacha xalqaro bozorda ommaviy savdolarga chiqarilishi belgilangandi.
Lotte City Hotel Tashkent Palace mehmonxonasini sotib olish bo‘yicha MDH, Janubiy Osiyo va Yevropa davlatlaridagi 15 nafar xalqaro hamda mahalliy investorlar tomonidan arizalar kelib tushgan. Ulardan faqat 3 tasi majburiy bo‘lgan takliflarni taqdim etgan.
Ushbu mehmonxonani sotib olish uchun qo‘yilgan talablariga qat’iy rioya etgan holda boshqa talabgorlarning tijorat taklifidan yuqori narx taklifini bildirgan Alfa Invest sug‘urta kompaniyasi AJ 20 mln AQSH dollari miqdorida sotib olish to‘lovini to‘lash sharti bilan savdo g‘olibi deb topilgan.
Investorga Lotte mehmonxonasi tashqi ko‘rinishining arxitektura qiyofasini inobatga olgan holda kelgusida har qanday qurilish-ta’mirlash va rekonstruksiya ishlarini Qurilish va uy-joy kommunal xo‘jaligi vazirligi hamda Madaniy meros agentligi bilan kelishilgan holda amalga oshirish bo‘yicha qat’iy talab qo‘yilgan.
Izoh (0)