O‘zbekistonning qator hududlarida kredit mablag‘larini o‘zlashtirish holatlari aniqlandi. Bu haqda Prokuratura departamenti xabar berdi.
Unga ko‘ra, holatlardan biri Bosh prokuratura huzuridagi departamentning Paxtachi tuman bo‘limi tomonidan o‘tkazilgan tergovga qadar tekshiruvda aniqlangan. “A.E.” xususiy korxonasi rahbari “E.A.” pishiq g‘isht ishlab chiqarish korxonasini tashkil etish uchun ajratilgan 2,2 mlrd so‘m imtiyozli kredit evaziga xarid qilingan uskunalarni sotib yuborib kredit mablag‘larini talon-toroj qilgan.
Shuningdek hududiy tijorat banki filiali mas’ul shaxslari “A.E.” korxonasi tomonidan ishlar to‘liq bajarilmagan bo‘lsa-da, uskunalarni garov ta’minoti sifatida olib qo‘ymagani aniqlangan.
Shu kabi departamentning Paxtakor tuman bo‘limi tomonidan o‘tkazilgan tergovga qadar tekshiruvda “O.S.” va “P.O.” MCHJ mas’ul shaxslari “P.O.” MCHJga yomg‘irlatib sug‘orish texnologiyasini sotib olish uchun tijorat banki filialidan ajratilgan kredit evaziga 849,9 mln so‘mlik ishlarni bajarib, 1,9 mlrd so‘m kredit mablag‘larini o‘zlashtirish yo‘li bilan talon-toroj qilgani aniqlangan.
Departamentning Qo‘ng‘irot tuman bo‘limi tomonidan o‘tkazilgan tergovga qadar tekshiruvda “Sh-Sh.” korxonasi mas’ul shaxslari va boshqalar avtomobillarga xizmat ko‘rsatish uskunalari olish uchun ajratilgan 1,4 mlrd so‘m kredit mablag‘ini “M.T.” MCHJ hisob raqamiga o‘tkazilib talon-toroj qilgani, shuningdek, bank filiali mas’ul shaxslari ajratilgan kredit mablag‘ining maqsadli sarflanishini va garovga qo‘yilgan mulkning saqlanishini o‘rganmaganliklari aniqlangan.
Mazkur holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 205-moddalari (hokimiyat yoki mansab vakolatini suiiste’mol qilish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)