Qashqadaryo viloyatining Kitob tumani hamda Andijon shahrida imtiyozli kredit mablag‘larini qo‘lga kiritgan shaxslar aniqlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Maʼlum qilinishicha, Kitob tumanida bank boshqaruvchisi sobiq o‘rinbosari O.X. “V.” fermer xo‘jaligi rahbari B.R. bilan o‘zaro til biriktirgan. So‘ng 6 nafar fuqaroning nomiga ajratilgan 163 mln so‘m imtiyozli kredit mablag‘ini “V.” fermer xo‘jaligi hisob raqamiga o‘tkazish orqali naqdlashtirib olgan.
Shuningdek, Andijon shahrida fuqaro A. va boshqalar fuqaro S.M.ning ishonchiga kirib, unga bankdan 100 mln so‘m imtiyozli kredit ajratib berishlarini vaʼda qilgan. So‘ng uning turmush o‘rtog‘i YATT G.M.ning nomiga 100 mln so‘m imtiyozli kredit ajratilishiga erishib, ushbu mablag‘larni “R.N.” MCHJ orqali naqdlashtirib olgan.
Mazkur holatlar yuzasidan Jinoyat kodeksining tegishli moddasi bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)