Хоразм вилояти ва Тошкент шаҳрида кредит маблағлари ажратилишига ёрдам беришни ваъда қилган шахслар ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, Боғот туманида фуқаролар И.Ю. ва Х.Н. тадбиркор С.М.нинг ишончига кириб, ўзларини гўёки банк ходими сифатида таништирган. Сўнг унинг тадбиркорлик фаолиятини ривожлантириши ҳамда субсидия асосида уй-жой олиши учун юқори лавозимда ишловчи танишлари ёрдамида 10 млрд сўм кредит ажратилишида ёрдам беришлари эвазига 110 минг доллар бериши кераклигини айтган.
Фуқаролар олдиндан 10 минг долларни олган вақтида ашёвий далиллар билан ушланган.
Шунингдек, Шайхонтоҳур туманида фуқаролар Д.М. (муқаддам судланган) ва Ж.И. “Д.Пҳ.” МЧЖнинг таъсисчиси ва раҳбари Н.И.нинг ишончига кириб, унга гўёки банк муассасасида ишловчи танишлари ёрдамида 1 млрд сўм имтиёзли кредит ажратиб беришни ваъда қилган.
Бунинг эвазига 5 минг доллар олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)