Ukraina 2025-yil uchun davlat byudjetidan mudofaa va xavfsizlik sektorlariga rekord darajadagi 54,2 milliard dollar (2,23 trillion grivna) ajratdi. Shundan 17,96 milliard dollari (739 milliard grivna) qurol-yarog‘ ishlab chiqarish, xarid qilish va dronlar uchun mo‘ljallangan. Bu haqda bosh vazir Denis Shmigal ma’lum qildi.
Davlat byudjetining eng katta qismi harbiy harakatlarni davom ettirishga ajratiladi. Shu bilan birga, ijtimoiy sohalar ham ustuvor yo‘nalishlar sifatida belgilangan. Jumladan:
- Ijtimoiy dasturlar uchun 10,24 milliard dollar (421 milliard grivna) ajratilib, mart oyida nafaqalar indeksatsiyasi amalga oshiriladi.
- Ta’lim uchun 4,84 milliard dollar (199 milliard grivna) va sog‘liqni saqlash uchun 5,27 milliard dollar (217 milliard grivna) ajratilgan. Ushbu mablag‘lar ta’lim va tibbiyot muassasalarini modernizatsiya qilishga yo‘naltiriladi.
- Xususan, shifoxonalarni yangilash va reabilitatsiya markazlari tashkil etish uchun 260,1 million dollar (10,7 milliard grivna), ta’lim muassasalarini modernizatsiya qilish va boshpanalar qurish uchun esa 425,4 million dollar (17,5 milliard grivna) yo‘naltirish ko‘zda tutilgan.
Ukraina bosh vaziri mahalliy byudjetlarga ajratiladigan mablag‘ kelgusi yili 15 foizga oshirilishini aytdi.
Biz hududlarni qo‘llab-quvvatlashni davom ettirmoqdamiz. 2025-yilda mahalliy byudjetlarni moliyalashtirish 15 foizga oshadi. Cheklangan resurslar sharoitida bu byudjet ustuvor yo‘nalishlarni aniq belgilab beradi. Mudofaa, xavfsizlik, xalqimizni qo‘llab-quvvatlash, mamlakatni rivojlantirish va tiklash shular jumlasidandir. Bularning barchasi bizni kuchliroq qiladigan va g‘alabaga olib boradigan narsalardir, dedi Denis Shmigal.
Davlat byudjeti loyihasi Ukraina parlamenti tomonidan qabul qilingan. Endilikda uni prezident Vladimir Zelenskiy imzolashi kutilmoqda.
Izoh (0)