Yoz kelishi bilan ko‘pchiligimiz quyoshdan himoya qiluvchi krem surtishni o‘zimizga eslatib yuramiz. Go‘yoki bu odatga aylangan. Lekin muammo shundaki — hatto eng qimmat SPF ham, bitta muhim jihat e’tibordan chetda qolsa, hech qanday foyda bermaydi. Birgina xato tufayli teringiz siz o‘ylagandek himoyalanmagan bo‘lishi mumkin. Rianna, Heyli Biber va boshqa mashhurlar bilan ishlaydigan dermatologlar nima deydi? Maqola davomida ularning fikrlari va haqiqatan ham ishlaydigan foydali maslahatlarini ulashamiz.
SPF surtgan bo‘lsangiz ham nimani noto‘g‘ri qilayotgan bo‘lishingiz mumkin?
Keng tarqalgan xatolardan biri — SPFni ertalab bir marta surtishning o‘zi kifoya, deb o‘ylashdir. Aksariyat odamlar ertalab krem surtib oladi-da, quyosh ostida kun bo‘yi yuraveradi. Aslida esa, SPF kremlar atigi 2–3 soat davomida ta’sir ko‘rsatadi. Ayniqsa, terlaganingizda, suzganda yoki plyajda yuzingizni sochiqqa ishqalayotgan bo‘lsangiz, kremning himoyaviy ta’siri yanada tez yo‘qoladi. Shu sababli dermatologlar quyoshdan himoyalovchi vositani har 2 soatda yangilab surtish kerakligini bir ovozdan ogohlantiradi.
Yana bir keng tarqalgan xato — kremni juda kam miqdorda surtish. Ko‘pchilik SPF ni juda oz suradi. Aslida esa, yuz va bo‘yin uchun kamida chorak choy qoshiq miqdorida krem kerak bo‘ladi. Bu taxminan ikki barmoq uzunligidagi kremga teng. Tana uchun esa bir kaft miqdorida SPF surtish tavsiya etiladi. Aks holda, krem teriga yetarli darajada to‘siq hosil qila olmaydi.
Ko‘pchilik yana bir xatoga yo‘l qo‘yadi — SPF ni noto‘g‘ri ketma-ketlikda qo‘llaydi. Masalan, ba’zilar quyoshdan himoya qiluvchi kremni namlantiruvchi vositadan oldin surtadi. Bu esa SPFning ta’sirini deyarli butunlay yo‘qqa chiqaradi. Eslab qoling: quyoshdan himoya qiluvchi krem parvarishning so‘nggi bosqichi bo‘lishi kerak. Ya’ni, barcha serumlar, namlantiruvchi kremlar va hattoki makiyajdan keyin surtiladi (agar makiyaj vositangiz SPF o‘z ichiga olmagan bo‘lsa, albatta).
Aktrisa Emma Roberts ilgari tonal kremidagi SPF yetarli deb o‘ylaganini tan olgan edi. Ammo uning vizajisti bu yetarli emasligini, ayniqsa tonal krem juda oz miqdorda surtilsa, himoya kuchsiz bo‘lishini tushuntirgan. Shundan so‘ng Emma SPF sprey vositasini makiyaj ustidan qo‘llay boshlagan.
Yulduzlarning dermatologlari bu mavzuda nima deydi?
Gollivud yulduzlari bilan ishlaydigan dermatologlar hattoki yulduzlar ham SPF dan foydalanishda xato qilishlari mumkinligini tan olishadi.Quyoshdan himoya vositasi ko‘plar uchun mavsumiy chora emas, balki kunlik go‘zallik tartibining ajralmas qismidir.
Heyli Biber va Bella Hadidning dermatologi, doktor Sherrin Idriss “Eng qimmat SPF ham noto‘g‘ri surtilsa va kun davomida yangilanmasa, foydasi bo‘lmaydi” deb ta’kidlaydi. U ko‘pincha SPF bilan qoplangan pudra yoki spreyni yonida olib yurishni maslahat beradi.
Rianna brendi Fenty Skin bilan ishlovchi jamoa esa qiziqarli sirni ochdi: qo‘shiqchi quyosh kremidan doimiy foydalanadi. Uning sumkasida har doim sayohat uchun mo‘ljallangan SPF krem bor va u uni hatto suratga olish orasida ham yangilaydi.
Kim Kardashyan hatto uyning oynasi yonida yoki yorqin studiya yoritgichi ostida ishlayotganda ham SPF surtishni unutmaydi, deydi uning dermatologi Garold Lanser.
Dermatolog quyoshdan himoyani hatto bulutli kunlarda ham yangilashni maslahat beradi, chunki ultrabinafsha nurlar bulutlardan o‘tib ketadi.
Xulosa qilib aytganda, bitta xato — eng qimmat SPF ham foydasiz bo‘ladi. Lekin yaxshi yangilik shuki, buni oson tuzatish mumkin: biroz ko‘proq e’tibor va intizom kerak. Agar Rianna suratga olish orasida SPF yangilay oladigan bo‘lsa, Heyli Biber esa makiyaj ustiga ham sura oladigan bo‘lsa, demak biz ham buni uddalashimiz mumkin. Axir, porlab turuvchi va himoyalangan teri — sehr emas, balki oddiy, to‘g‘ri odatdir.
Izoh (0)