AQSHning sobiq prezidenti Donald Tramp Ukrainada sodir bo‘layotgan holatlarni genotsid deb atadi. Bu haqda u Fox News telekanaliga bergan intervyusida ma’lum qilgan.
Dastlabki telekanal boshlovchisi Trampga AQSHda 41 yildan beri birinchi marta kuzatilgan rekord darajadagi inflyatsiyaga izoh berishni taklif qilgan. Bunga javoban sobiq prezident Jo Baydenning siyosati shu kabi yuqori inflyatsiya darajasini yuzaga keltirganini aytgan. Trampning fikricha, u prezident bo‘lgan davrda “jahon tarixidagi eng yuqori iqtisodiyot” yaratilgan, biroq Bayden lavozimga kirishgach, “barchasi barbod bo‘lgan”.
“Bularning barchasi o‘z-o‘ziga yetkazilgan jarohat edi, inflyatsiyadan tortib, energiya mustaqilligining yo‘qotilishigacha. Buni kuzatish juda ayanchli, endi bunga Ukrainada sodir bo‘layotgan voqealarni qo‘shing. Ukrainada sodir bo‘layotgan narsalar — bu genotsid. Odamlar avval hech qachon bunaqa narsani ko‘rmagan”, — deydi Tramp.
Avvalroq AQSH prezidenti Jo Bayden rossiyalik harbiylarning Ukrainadagi harakatlarini genotsid deb atagan edi. Oq uy rasmiy vakili Jen Psaki keyinroq ushbu so‘zlar Baydenning shaxsiy fikri ekani va bu uning Ukrainadagi vaziyat haqidagi qarashlarini aks ettirishini ma’lum qildi. Shuningdek, u AQSH prezidentining bayonoti tinchlik muzokaralari istiqboliga putur yetkazmasligi va mamlakatning vaziyatni hal qilish bo‘yicha pozitsiyasiga ta’sir qilmasligini qo‘shimcha qilgan.
Kreml Baydenning so‘zlarini nomaqbul deb ta’riflagan. “Biz mutlaqo qo‘shilmaymiz, vaziyatning bunday buzib ko‘rsatilishi nomaqbul”, — deydi Rossiya prezidentining matbuot kotibi Dmitriy Peskov.
Izoh (0)