Putin Kiyevni 3-4 kun ichida egallashni rejalashtirgan. Washington Post Putinning Ukrainadagi rejalarini fosh qildi

AQSH prezidenti Jo Bayden, shuningdek, Amerikaning siyosiy va harbiy rahbariyati bir necha oy oldindan Rossiya prezidentining Ukrainaga hujum qilish rejalaridan boxabar bo‘lgan va o‘zlarida bor ma’lumotni Kiyev va Moskvaga yetkazish orqali ushbu xatti-harakatlar oldini olishga uringan. Bu haqda Washington Post AQSH, Yevropa, NATO va Ukraina yuqori mansabli shaxslari orasidagi 30 dan ortiq manbalariga tayanib xabar berdi.

Nashr ma’lumotlariga ko‘ra, 2021-yil oktabrida Oval kabinetda prezident Bayden, vitse-prezident Kamala Xarris, davlat kotibi Entoni Blinken, mudofaa vaziri Ostin Lloyd, AQSH armiyasi generali Mark Milli va boshqalar ishtirokida uchrashuv bo‘lib o‘tgan.

Unda Baydenga sun’iy yo‘ldoshdan olingan tasvirlar, tutib olingan ma’lumotlar va manbalardan olingan axborot asosida tuzilgan, Putinning Ukrainaga katta ko‘lamdagi hujum rejalari haqidagi maxfiy razvedka ma’lumotlari taqdim etilgan.

Bir necha oylar davomida AQSH razvedkasi Rossiya armiyasining Ukraina chegarasi bo‘ylab joylashayotganini kuzatib turgan. Baydenga Moskva katta ko‘lamli hujumga tayyorligini ma’lum qilishgan.

“Amerika rasmiy shaxslari so‘zlariga ko‘ra, AQSH razvedka hamjamiyati Rossiya siyosiy rahbariyati, josuslik apparati va qurolli kuchlarining ko‘plab bo‘g‘inlariga kirib borgan”, — deyiladi nashr xabarida.

Ma’ruzani tinglagach, Bayden Putinni tiyib turish yoki unga qarshi chiqishga qat’iy bel bog‘lagan. Ammo NATO a’zolarining barchasi ham AQSH bilan hamjihatligini bildirmagan, chunki Iroq, Afg‘onistondan qo‘shinlarning olib ketilishi va Donald Tramp prezidentligidan keyin Amerika prezidenti “bosqinchi Rossiyaga qarshi G‘arbning javobiga samarali rahbarlik qila olishi”ga shubhalar bor edi.

Ma’ruza chog‘ida Mark Milli Rossiya bir nechta yo‘nalishlarda hujum boshlashni rejalashtirayotganini ma’lum qildi.

Xususan:

• Kiyevga Chernigov va Chernobil tomondan hujum qilinishi kerak edi (qish ob-havosi tanklarning harakatlanishiga imkoniyat yaratishi kerak edi);
• 3—4 kun ichida Rossiya maxsus topshiriqli bo‘linmalari Zelenskiyni topib, zarur bo‘lsa, o‘ldirib, hokimiyatdan tushirishi va qo‘g‘irchoq hokimiyat o‘rnatishi kerak edi;
• bir necha haftalar ichida qo‘shinlarning boshqa guruhi Dnepr janubi va chap sohillarini egallab, so‘ng g‘arbga qarab yo‘l olishi kerak edi.

Majlisdan keyin Bayden ikkita qaror qabul qilgan: Rossiya rahbariyatini ehtimoliy hujum oqibatlari haqida ogohlantirish uchun Moskvaga kimnidir yuborish, shuningdek, ittifoqdoshlarni Rossiya bilan bog‘liq masalada yagona pozitsiyada turish zarurligi haqida xabardor qilish.

Washington Post eslatishicha, Oq uy razvedka ma’lumotlarini Kiyevga uzatgan, biroq u yerda Rossiya hujumi haqidagi axborotga shubha bilan qarashgan.