AQSH, Buyuk Britaniya va Fransiya Birlashgan Millatlar Tashkiloti Xavfsizlik kengashining bugun, 19-oktabrda o‘tkaziladigan yopiq majlisida Eronning Rossiyaga qurol yetkazib berishi masalasini ko‘tarmoqchi, deb xabar berdi Reuters.
Ukraina Rossiyani BMT Xavfsizlik Kengashining Erondan qurol import qilishga embargo qo‘yish rezolyutsiyasini buzganlikda ayblamoqda. Nashrga izoh bergan diplomatlarning ta’kidlashicha, har uchala davlat ham Eron dronlarining olib kirilishi BMT Xavfsizlik kengashining 231-rezolyutsiyasini buzish, deb hisoblaydi. G‘arb davlatlari vakillari BMT vakilidan Xavfsizlik Kengashi a’zolarini ushbu masala bo‘yicha xabardor qilishni so‘ramoqda.
Bundan tashqari, Ukraina BMT ekspertlarini Rossiya ushbu rezolyutsiyani buzgan holda Ukrainadagi nishonlarga hujum qilish uchun foydalanayotgan Eron dronlarni kelib tekshirishga chaqirdi.
“Biz BMT Xavfsizlik Kengashining 2231-rezolyutsiyasini amalga oshirishga hissa qo‘shish maqsadida qo‘lga olingan Eron dronlarini tekshirish uchun BMT ekspertlarini imkon qadar tezroq Ukrainaga tashrif buyurishga taklif qilmoqchimiz”, — deyiladi Ukrainaning BMTdagi doimiy vakili maktubida.
14-oktabrdagi maktubda aytilishicha, Shahed va Mohajer seriyali dronlari avgust oyi oxirida Rossiyaga topshirilgan, bu esa Ukraina va yirik G‘arb davlatlari 2015-yilda Eron yadroviy kelishuvini ma’qullagan 2231-rezolyutsiyani buzish hisoblanadi.
Rezolyutsiyaga ko‘ra, Eronga qarshi odatiy qurol embargosi 2020-yilning oktabrigacha amal qilgan. AQSH sobiq prezident Donald Tramp davrida qurol embargosini uzaytirish harakatlariga qaramay, BMT Xavfsizlik Kengashi bu taklifni rad etib, Eronga qurol eksportini qayta tiklashga ruxsat bergan.
Biroq, Ukraina va AQSHning ta’kidlashicha, rezolyutsiya hali ham raketalar va muayyan texnologiyalarga cheklovlarni o‘z ichiga oladi, ular 2023-yil oktabrigacha amal qiladi va Eron uchun uchuvchisiz uchar apparat kabi ilg‘or harbiy tizimlarni eksport qilish va sotib olishni taqiqlaydi.
Ukraina doimiy vakilining maktubida aytilishicha, Mohajer va Shahed dronlari 2231-rezolyutsiyada nazarda tutilgan parametrlarga javob beradi, chunki ularning uchish masofasi 300 kilometrga teng yoki undan oshadi.
Ukrainaga kamikadze dronlarining hujumi
17-oktabr kuni Rossiya Ukraina bo‘ylab o‘nlab kamikadze dronlarini uchirdi, bu esa energetika infratuzilmasiga zarar yetkazdi, Kiyevda besh kishi halok bo‘ldi.
Ukraina tomonining aytishicha, Moskva Eronda ishlab chiqarilgan Shahed-136 zarba beruvchi dronlaridan foydalanmoqda. Ushbu dronlar nishonga qarab uchadi, so‘ng pastlab, zarba berish paytida portlaydi.
18-oktabr kuni rasmiy Kiyev Eron Rossiyaga qurol yetkazib berayotgani sababli Islom respublikasi bilan munosabatlarni uzishga qaror qildi.
Tehron Moskvaga dronlar yetkazib berayotganini rad etmoqda, Kreml esa bu haqda izoh bermayapti. Vashingtonning fikricha, Eron haqiqatdan ham Rossiyaga qurol eksport qilmoqda.
Eronning ikki yuqori martabali rasmiysi va ikki diplomatining Reuters agentligiga ma’lum qilishicha, Eron Rossiyaga dronlardan tashqari “yer-yer” raketalarini ham va’da qilgan.
Izoh (0)