Jo Bayden va Vladimir Putinning uchrashuvi, bugun, 16-iyun kuni bo‘lib o‘tadi. AQSh va Rossiya prezidentlari Shveysariyaning Jeneva shahridagi La Grange villasida yuzma-yuz muzokara o‘tkazadi. Jenevada ikki davlat rahbarlarining tashrifi uchun tayyorgarlik ishlari davom etmoqda.
Muzokaralar yakunida Putin va Bayden qo‘shma matbuot anjumani o‘tkazmaydi. The New York Times nashrining yozishicha, Moskva qo‘shma brifing o‘tkazish taklifini bildirgan, Vashington esa buni rad qilgan. Nashrning ta’kidlashicha, bunga 2018-yilda Tramp bilan o‘tkazgan matbuot anjumanida Putinning Amerika rahbaridan “ustun kelgani” sabab bo‘lgan.
Vladimir Putin Jenevaga muzokaralar o‘tkaziladigan 16-iyun kuni keladi. Bu uning pandemiya davomidagi birinchi xorijiy safari bo‘ladi. AQSh prezidenti Jo Bayden esa 15-iyun, seshanba kuni Jenevaga yetib keldi. Aeroportda uni Shveysariya prezidenti Gi Parmelin va Jeneva kanton hukumati rahbari Serj Dal Byusko kutib oldi. Bayden InterContinental mehmonxonasida qoladi. Mehmonxona hududi huquq-tartibot organlari xodimlari tomonidan o‘rab olingan.
Rossiya delegatsiyasi tarkibida prezidentning yordamchisi Yuriy Ushakov, prezident matbuot kotibi Dmitriy Peskov, tashqi ishlar vaziri Sergey Lavrov va uning o‘rinbosari Sergey Ryabkov, AQShdagi elchi Anatoliy Antonov va bosh shtab boshlig‘i Valeriy Gerasimov bo‘ladi. Shuningdek, prezident ma’muriyati rahbarining o‘rinbosari Dmitriy Kozak va Suriya bo‘yicha maxsus vakili Aleksandr Lavrentiyev ham delegatsiyaga taklif qilingan.
Meduza xabar berishicha, 15-iyun kuni kechqurun Jenevada Rossiya koloniyasida saqlanayotgan muxolifatchi siyosatchi Aleksey Navalniyni qo‘llab-quvvatlash uchun miting bo‘lib o‘tdi. Videoyozuvlarga qaraganda aksiyaga o‘nlab odamlar to‘plangan.
Ulardan ayrimlarining qo‘lida Navalniyni qo‘llab-quvvatlovchi (Free Navalniy) va Rossiya prezidenti Vladimir Putinga qarshi (Putin, stop drinking blood of Russia) yozuvlar tushirilgan plakatlar bor. Yig‘ilganlarning bir qismi Belarus va Ukraina bayroqlarini ko‘tarib olgan. Namoyishchilar “Yo‘qolsin shoh!”, “Putinsiz Rossiya!”, “Rossiya ozod bo‘ladi!” kabi shiorlarni aytib baqirgan.
Izoh (0)