Xalqaro Lonely Planet nashri Qozog‘istonni 2025-yilda sayohat qilish uchun eng yaxshi mamlakatlar qatoriga kiritdi.
Respublika o‘zining boy tarixi, rang-barang landshaftlari va noyob madaniy merosi bilan boshqa mamlakatlar orasida ajralib turadi.
Qozog‘iston faqatgina tashrif buyurish joyi emas, balki kashf etilishi lozim bo‘lgan butun bir olam, amalga oshirilishi kerak bo‘lgan sayohat va siz bir qismiga aylanadigan tarixdir. Qadimiy Ipak yo‘lining shivirlashi Qozog‘iston shaharlarini o‘rab turgan bepoyon dasht-u sahrolarda his etiladi, deydi nashr mualliflari.
Bugungi kunda Qozog‘istonning sayyohlik sohasida yarim millionga yaqin kishi mehnat qilmoqda, sohaga kiritilgan sarmoyalar hajmi esa 1,6 milliard dollarga yetgan. Markaziy Osiyoning eng yirik mamlakatida 14 ta milliy bog‘ mavjud bo‘lib, 2023-yil yakunlariga ko‘ra ularga 2,4 million sayyoh tashrif buyurgan, bu o‘tgan yilga nisbatan 20 foiz ko‘pdir.
Birgina 2024-yil sentyabr oyida Qozog‘istonga 600 mingga yaqin sayyoh kelgan. Bunga asosiy omil V Butunjahon ko‘chmanchilar o‘yinlarining o‘tkazilishi va qozog’istonlik Dimash Kudaybergenning konserti bo‘ldi. Bundan tashqari, Qozog‘iston prezidenti Qosim-Jo‘mart To‘qayev topshirig‘iga binoan uchta asosiy turizm yo‘nalishini — Olmaota tog‘ klasteri, Mang‘istov va Shuchinsk-Borovo kurort zonalarini rivojlantirishga e’tibor qaratildi.
Dunyoga mashhur sayyohlik nashrlari Qozog‘istonning sayyohlik salohiyatiga birinchi marta yuqori baho bermayapti.
1972-yilda Avstraliyada asos solingan Lonely Planet nashri asosan o‘rtacha daromadli sayyohlar uchun qo‘llanmalar chiqarishga ixtisoslashgan. Nashriyotning yillik tiraji dunyo bo‘ylab 6 million nusxaga yetadi. Har yili Lonely Planet mutaxassislari sayyohlar, travel blogerlar va turizm sohasidagi boshqa professional shaxslarning tavsiyalariga asoslanib, sayohat yo‘nalishlarini tanlaydi.
Izoh (0)