Rossiya Qozog‘istonni Yevrosiyo iqtisodiy ittifoqi (YOII) shartnomasining tranzit tarifiga oid asosiy prinsipini buzganlikda aybladi. Bu haqda Hukumatlararo komissiyaning 25-majlisi bayonnomasiga tayanib, “KazTag” xabar berdi.
Rossiya vakillari ta’kidlashicha, “Qozog‘iston temir yo‘llari” milliy kompaniyasining (“QTJ” MK) tranzit tariflarini oshirish to‘g‘risidagi qarori “noteng sharoitlarni” vujudga keltirgan — YOIIga a’zo davlatlar uchun yuk tashish qozog‘istonliklarga nisbatan qimmatroqqa tushmoqda.
Qozog‘iston tomonining ma’lumotlariga ko‘ra, tarif shartlarini o‘zgartirish iqtisodiy asoslangan xarajatlarni qoplash va temir yo‘l infratuzilmasini rivojlantirish zarurati tufayli qabul qilingan. Bu YOII to‘g‘risidagi shartnoma qoidalariga hamda Qozog‘iston milliy qonunchiligiga zid emas.
2024-yil 16-apreldan boshlab “QTJ” MKning ayrim yuklarga belgilangan infratuzilma tariflari darajasining o‘zgarishi “Rossiya temir yo‘llari” tarifi darajasidan oshmaydi, deya ta’kidlamoqda Qozog‘iston vakillari.
Rossiya tomoni YOII to‘g‘risidagi shartnoma a’zo davlatlarining tarif tizimlari o‘rtasida majburiy muvofiqlikni nazarda tutmasligini qayd etdi. Yevroosiyo iqtisodiy komissiyasining ichki bozorlar faoliyati departamenti Qozog‘iston tomonining temir yo‘l tariflariga narx chegaralarini qo‘llashi bo‘yicha YOII to‘g‘risidagi shartnoma qoidalarining buzilishi holatlarini aniqlamadi.
Izoh (0)