“Biz yangi Qoraqalpog‘istonni ko‘rdik” — chet elda yashayotgan qoraqalpoq diasporasi faollari mamlakat bo‘ylab sayohat qildi

Qoraqalpog‘istonda tug‘ilib, shu yerda yashab, keyinroq Qozog‘iston va Rossiyaga ko‘chib ketgan qoraqalpoq diasporasi faollari va bir guruh qoraqalpoq faxriylari mamlakatda amalga oshirilgan bunyodkorlik ishlari bilan tanishdi. Bu haqda “Daryo” muxbiri xabar bermoqda.

Mehmonlar dastlab Taxtako‘pir tumaniga tashrif buyurdi. Qadim tarix ramziga aylangan, asrlar osha o‘z balig‘i bilan xalqni boqqan Qarateren ko‘li hududi ayni vaqtda etnoturistik manzilga aylanmoqda.

Yana bir manzil — Nukus shahrida 16 qavatli binodan iborat IT-park filiali. Umumiy maydoni 14 ming 792 metr kvadrat bo‘lgan mazkur binoda IT-markaz, kibersport, robototexnika, IT-laboratoriyalar, konferens-zallar, o‘quv xonalari, kovorking markazlari va ofis binolari joylashgan.

Qoraqalpog‘istondan 29 yil avval ko‘chib ketgan Luiza O‘rinbetovaning aytishicha, mamlakatda juda katta o‘zgarishlar bo‘lgan.

Qoraqalpog‘istonda yashab keyinchalik Qozog‘iston va Rossiyaga ko‘chib ketganlarni mehmonga taklif qilishdi. Buni eshitiboq xursand bo‘lib keldik. Mamlakat juda rivojlanib ketibdi. Rostdan ham biz bugun Yangi Qoraqalpog‘istonni ko‘rdik!, deydi Luiza O‘rinbetova.

Nukus shahrida Ginnes rekordlari kitobiga kiritilgan  “Oq qush” majmuasida barpo etilgan dunyodagi eng katta diametrli qoraqalpoq xalqining milliy qora uyi (o‘tov) mehmonlarda iliq taassurot qoldirdi. Mazkur o‘tovning diametri 40,5 metrdan iborat.

Qozog‘iston respublikasi Atrau shahri Edil Jayiq qoraqalpoq etnomadaniy markazi rahbari Pishenbayev Jetkerbay ham o‘z fikrlarini bildirdi.

Qoraqalpog‘istondan ko‘chib ketganimga 20 yil bo‘ldi. Oxirgi marta 4 yil avval kelgandim. Bu yerda katta o‘zgarishlar bo‘lganiga guvoh bo‘lyapman. Bizning nazarimizda rivojlanishda eng orqada deb hisoblab yurgan Taxtako‘pir tumani o‘zgarib ketibdi. Bu yerda dam olish maskanlari qurilgani, yo‘llar va bog‘lar bunyod etilgani meni quvontirdi.

Qorao‘zak, Chimboy tumanlarida ham katta o‘zgarishlar bo‘lganiga guvoh bo‘ldik. Nukus shahrida ko‘p qavatli uylar qurilibdi. To‘rt yil avval kelganimda yo‘q edi. Bular prezident Shavkat Mirziyoyevning Qorqalpog‘istonga bo‘lgan alohida e’tibori deb o‘ylayman, deydi Pishenbayev Jetkerbay.

Uch kunlik sayohat davrida mehmonlar “Sulton Uvays Qaroniy” majmuasi, “Tuproqqal’a” yodgorligi, To‘dako‘l sohili va Mo‘ynoq tumaniga tashrif buyurdi.