Qozog‘istonda Turkiyaning mashhur Bayraktar harbiy dronini mahalliy ishlab chiqarish yo‘lga qo‘yilishi mumkin. Mudofaa vaziri Ruslan Jaksilikov Baykar Defence kompaniyasi bosh direktori Haluk Bayraktar bilan muzokaralar o‘tkazdi.
Qozog‘iston mudofaa vazirining Turkiyaga tashrifi ikki mamlakat o‘rtasidagi harbiy-texnik hamkorlikni rivojlantirish doirasida amalga oshirilmoqda. Jaksilikov boshchiligidagi Qozog‘iston delegatsiyasi SAHA EXPO-2024 mudofaa va aerokosmik sanoatining IV xalqaro ko‘rgazmasining ochilishida ishtirok etgan.
Ko‘rgazmada eng so‘nggi mudofaa texnologiyalari namoyish etildi: qo‘shinlarni avtomatik boshqarish tizimlari, robototexnika majmualari, aloqa tizimlari, havo mudofaasi, radiorazvedka va radioelektron kurash vositalari. Uchuvchisiz uchish apparatlari, yuqori aniqlikdagi qurollar va ilg‘or lazer texnologiyalari alohida e’tiborni tortdi, deyiladi vazirlik xabarida.
Ko‘rgazma doirasida Jaksilikov bir qator muhim muzokaralar o‘tkazgan. Uchrashuvlar Turkiya milliy mudofaa vaziri Yashar Guler, Turkiya Mudofaa sanoati agentligi raisi Haluk Gorgun va BAA bosh vaziri o‘rinbosari, mudofaa vaziri Muhammad bin Roshid Al-Maktum bilan bo‘lib o‘tgan.
Baykar Defence kompaniyasi bosh direktori Haluk Bayraktar bilan o‘tkazilgan muzokaralar alohida va muhim voqea bo‘ldi. Tomonlar mamlakatimiz hududida taktik uchuvchisiz aviatsiya tizimlari va operativ darajadagi o‘q-dorilarni ishlab chiqarishni mahalliylashtirish bo‘yicha yo‘l xaritasini tayyorlash to‘g‘risida kelishuvga erishdi, deydi Mudofaa vazirligi.
Izoh (0)