Халқаро Lonely Planet нашри Қозоғистонни 2025 йилда саёҳат қилиш учун энг яхши мамлакатлар қаторига киритди.
Республика ўзининг бой тарихи, ранг-баранг ландшафтлари ва ноёб маданий мероси билан бошқа мамлакатлар орасида ажралиб туради.
Қозоғистон фақатгина ташриф буюриш жойи эмас, балки кашф этилиши лозим бўлган бутун бир олам, амалга оширилиши керак бўлган саёҳат ва сиз бир қисмига айланадиган тарихдир. Қадимий Ипак йўлининг шивирлаши Қозоғистон шаҳарларини ўраб турган бепоён дашт-у саҳроларда ҳис этилади, дейди нашр муаллифлари.
Бугунги кунда Қозоғистоннинг сайёҳлик соҳасида ярим миллионга яқин киши меҳнат қилмоқда, соҳага киритилган сармоялар ҳажми эса 1,6 миллиард долларга етган. Марказий Осиёнинг энг йирик мамлакатида 14 та миллий боғ мавжуд бўлиб, 2023 йил якунларига кўра уларга 2,4 миллион сайёҳ ташриф буюрган, бу ўтган йилга нисбатан 20 фоиз кўпдир.
Биргина 2024 йил сентябрь ойида Қозоғистонга 600 мингга яқин сайёҳ келган. Бунга асосий омил V Бутунжаҳон кўчманчилар ўйинларининг ўтказилиши ва қозоғистонлик Димаш Кудайбергеннинг концерти бўлди. Бундан ташқари, Қозоғистон президенти Қосим-Жўмарт Тўқаев топшириғига биноан учта асосий туризм йўналишини — Олмаота тоғ кластери, Манғистов ва Шучинск-Борово курорт зоналарини ривожлантиришга эътибор қаратилди.
Дунёга машҳур сайёҳлик нашрлари Қозоғистоннинг сайёҳлик салоҳиятига биринчи марта юқори баҳо бермаяпти.
1972 йилда Австралияда асос солинган Lonely Planet нашри асосан ўртача даромадли сайёҳлар учун қўлланмалар чиқаришга ихтисослашган. Нашриётнинг йиллик тиражи дунё бўйлаб 6 миллион нусхага етади. Ҳар йили Lonely Planet мутахассислари сайёҳлар, травел блогерлар ва туризм соҳасидаги бошқа профессионал шахсларнинг тавсияларига асосланиб, саёҳат йўналишларини танлайди.
Изоҳ (0)