Eron Tashqi ishlar vazirligi matbuot kotibi Ismoil Bag‘ayning ma’lum qilishicha, Tehron Isroilning 26-oktyabrga o‘tar kechasi uyushtirgan hujumiga javob qaytarishga haqli.
Shu bilan birga, u Eron o‘z harbiy doktrinasiga amal qilishda davom etishiga va yadroviy qurol yaratishni rejalashtirmasligiga ishontirgan.
“Ommaviy qirg‘in qurollari bo‘yicha pozitsiyamiz juda aniq va o‘zgarishsiz qolmoqda: mamlakat oliy diniy-siyosiy hokimiyatining fatvosi hamda sog‘lom fikrga asoslanib, yadroviy dasturimizni harbiy oqimga yo‘naltirmoqchi emasmiz”, deydi eronlik rasmiy.
Vazirlik vakilining qo‘shimcha qilishicha, AQSH uzoq yillardan beri Eronning harbiy qudratini zaiflashtirish maqsadini ko‘zlab kelmoqda. Uning so‘zlariga ko‘ra, Tehron bunga yo‘l qo‘ymaydi. U, shuningdek, Eron hech qachon urushga intilmaganini, balki o‘zini himoya qilishga doim tayyor ekanini aytgan.
2003-yildan beri Eronda mamlakat oliy rahnamosi fatvosiga amal qilinadi, unga ko‘ra islomga zidligi tufayli yadroviy qurol ishlab chiqarish taqiqlanadi. Avvalroq Eron qonunchilari Oliy Milliy xavfsizlik kengashini mudofaa doktrinasini qayta ko‘rib chiqish va yadro qurolini yaratishga ruxsat berishga chaqirgandi.
26-oktyabrga o‘tar kechasi Isroil harbiy-havo kuchlari Erondagi harbiy obyektlarga havo hujumlarini amalga oshirgan edi. Isroil bu zarbalarni Eronning bir necha oy davom etgan hujumlariga javob deb atagan. Isroil tomoni, shuningdek, Eronning strategik mudofaa qobiliyati butunlay yo‘q qilinganini da’vo qilgan.
Izoh (0)