Eron prezidenti Masʼud Pezeshkiyon BMT sanksiyalariga uchragan shaxsni yadroviy loyiha ustida ish olib boruvchi agentlik rahbari etib tayinladi. Bu haqda Al Arabiya nashri xabar berdi.
Eron davlat televideniyesi 10-avgust kuni ushbu yangilikni eʼlon qilgan. Unda aytilishicha Eron yadroviy departamentiga olim Muhammad Islomiy rahbar etib tayinlangan.
Muhammad Islomiy bundan 16 yil oldin Birlashgan Millatlar Tashkiloti sanksiyalariga uchragan. Unga Eron yadroviy dasturida qatnashganlik va yordam berganlik uchun taqiqlar kiritilgan.
67 yoshli Muhammad Islomiy prezident tomonidan yadroviy loyiha rahbarligiga rasman tayinlangan. U ayni paytda Pezeshkiyonning yadroviy masalalar bo‘yicha maslahatchisi sifatida ham faoliyat olib borishi aytilgan.
Islomiyning vazifaga tayinlanishi Eron hukumati tomonidan 2015-yildagi yadroviy kelishuvlarni istisno qilish bilan bir paytga to‘g‘ri kelmoqda. Eron endilikda ikki tomonlama kelishuvga muvofiq yadroviy hamkorlarni tanlash borasidagi o‘ziga qo‘yilgan taqiqlarga zid harakat qilishni boshlagan.
Oldinroq Eronning yangi saylangan prezidenti Pezeshkiyon prezidentlik kampaniyasi vaqtida yadroviy kelishuvni jonlantirishga harakat qilishini aytgan edi. Islomiyning bu dasturga jalb qilinishi Tehron hukumatining yadroviy poygaga qatʼiy kirishgani ifodasi bo‘lishi mumkin.
Berilgan maʼlumotlarga qaraganda, Muhammad Islomiy 2008-yilda Eronning Mudofaa sanoati bo‘yicha o‘quv va tadqiqot instituti rahbari bo‘lgan paytida “yadroviy qurol yetkazib berish tizimlarini rivojlantirish bilan shug‘ullangani, bevosita aloqadorligi yoki qo‘llab-quvvatlagani” uchun BMT sanksiyasiga uchragan. U 2021-yilda marhum prezident Ibrohim Raisiy tomonidan ilk bor Eron yadro boshqarmasi boshlig‘i lavozimiga tayinlangan edi. Bungacha, 2018-yildan boshlab, mo‘tadil sobiq prezident Hasan Ruhoniy davrida Islomiy transport va shaharsozlik vaziri bo‘lib ishlagan.
Muhammad Islomiy Eronning harbiy sanoatida yillar davomida ishlagan, mudofaa vazirining tadqiqot va harbiy sanoat bo‘yicha o‘rinbosari lavozimida ishlagan.
U, shuningdek, Michigan shtatidagi Detroyt universiteti va Ogayo shtatidagi Toledo universitetlarida qurilish muhandisligi bo‘yicha ilmiy darajaga erishgan.
Maʼlumot o‘rnida, Eron mamlakat janubidagi Bushir shaharchasida 1000 megavatt quvvatga ega yagona yadroviy reaktorini joylashtirgan. Ushbu reaktorni taʼminlash uchun esa ikkita yirik atom elektr stansiyasi qurilmoqda.
O‘zining uzoq muddatli energiyani ko‘paytirish rejasiga muvofiq Tehrondagi hukumat 20 000 megavatt yadroviy elektr quvvatiga erishishni maqsad qilgan. Resurs va manbalar yetarli bo‘lmagani bois mamlakatda so‘nggi oylarda oddiy aholi punktlari tarmoqdan uzilishi holatlari kuzatilmoqda.
Izoh (0)