Эрон Ташқи ишлар вазирлиги матбуот котиби Исмоил Бағайнинг маълум қилишича, Теҳрон Исроилнинг 26 октябрга ўтар кечаси уюштирган ҳужумига жавоб қайтаришга ҳақли.
Шу билан бирга, у Эрон ўз ҳарбий доктринасига амал қилишда давом этишига ва ядровий қурол яратишни режалаштирмаслигига ишонтирган.
“Оммавий қирғин қуроллари бўйича позициямиз жуда аниқ ва ўзгаришсиз қолмоқда: мамлакат олий диний-сиёсий ҳокимиятининг фатвоси ҳамда соғлом фикрга асосланиб, ядровий дастуримизни ҳарбий оқимга йўналтирмоқчи эмасмиз”, дейди эронлик расмий.
Вазирлик вакилининг қўшимча қилишича, АҚШ узоқ йиллардан бери Эроннинг ҳарбий қудратини заифлаштириш мақсадини кўзлаб келмоқда. Унинг сўзларига кўра, Теҳрон бунга йўл қўймайди. У, шунингдек, Эрон ҳеч қачон урушга интилмаганини, балки ўзини ҳимоя қилишга доим тайёр эканини айтган.
2003 йилдан бери Эронда мамлакат олий раҳнамоси фатвосига амал қилинади, унга кўра исломга зидлиги туфайли ядровий қурол ишлаб чиқариш тақиқланади. Аввалроқ Эрон қонунчилари Олий Миллий хавфсизлик кенгашини мудофаа доктринасини қайта кўриб чиқиш ва ядро қуролини яратишга рухсат беришга чақирганди.
26 октябрга ўтар кечаси Исроил ҳарбий-ҳаво кучлари Эрондаги ҳарбий объектларга ҳаво ҳужумларини амалга оширган эди. Исроил бу зарбаларни Эроннинг бир неча ой давом этган ҳужумларига жавоб деб атаган. Исроил томони, шунингдек, Эроннинг стратегик мудофаа қобилияти бутунлай йўқ қилинганини даъво қилган.
Изоҳ (0)