Ukraina prezidenti Vladimir Zelenskiy Rossiya bilan ziddiyatda o‘z mamlakatini xavf ostiga qo‘yadi. Bu haqda KXDR yetakchisining singlisi, Shimoliy Koreya Mehnat partiyasi Markaziy qo‘mitasi bo‘lim boshlig‘i o‘rinbosari Kim Yo Chjon ma’lum qildi.
Shu tariqa Kim Yo Chjon Ukraina prezidenti saytida AQSH yadro qurolini o‘z hududiga joylashtirish yoki o‘zining yadroviy arsenalini yaratishga chaqiruvchi petitsiyaga munosabat bildirdi. U petitsiya “jamoatchilik fikrining asosli bo‘lishiga qaramay, Zelenskiy rasmiylarining ayyor siyosiy manyovri natijasi” ekanini aytdi.
“Ukraina rasmiylari yadroviy ambitsiyalari haqida bir necha marta, jumladan, 2022-yil Myunxen Xavfsizlik konferensiyasida Zelenskiy mamlakatning yadro quroli maqomini tiklash niyatini e’lon qilganida ham ochiq gapirgani hammaga ma’lum”, — dedi KXDR rasmiysi.
U Ukraina rasmiylari “davolab bo‘lmaydigan megalomaniyadan aziyat chekayotgani” va go‘yoki Rossiya ustidan hokimiyatni qo‘lga olish niyatidaligini qayd etdi.
“Zelenskiyning AQSH yadroviy arsenaliga qo‘shilish va o‘zining yadroviy arsenalini rivojlantirish haqidagi ritorikasi o‘ta xavfli siyosiy ambitsiya bo‘lib, o‘z terisini saqlab qolish uchun mamlakati va xalqining taqdirini xavf ostiga qo‘yishni anglatadi”, — deydi Kim Yo Chjon.
KXDR yetakchisining singlisi Ukraina rasmiylarida “hech qanday siyosiy sezgirlik yo‘q”ligi va ular “o‘z xalqini halokatga” olib borayotganini aytdi. Kim Ye Chjon Ukraina rasmiylari “AQSH yadroviy soyabon” ostida “Rossiyaning qudratli olovidan” qutulmoqchiligi, KXDRda bu Ukraina uchun “oxirgi” yo‘l hisoblanishini aytdi.
Izoh (0)