Shimoliy Koreya to‘rt kun ichida to‘rtinchi marta raketa uchirdi

Shimoliy Koreya Yapon dengizi tomon yana ballistik raketa uchirdi, deb xabar bermoqda NHK Yaponiya mudofaa vazirligiga tayanib.

Raketa Yaponiya iqtisodiy zonasidan tashqarida, Koreya yarim orolidan 550 kilometr sharqda qulagan.

Bu KXDR tomonidan to‘rt kun ichida to‘rtinchi raketa uchirilishi. 15-martga o‘tar kechasi Shimoliy Koreya o‘rta masofaga mo‘ljallangan ikkita “yer-yer” ballistik raketasini uchirgandi.

13-martga o‘tar kechasi Shimoliy Koreya harbiylari suvosti kemasidan ikki qanotli raketani, 14-mart tongida esa Yapon dengizi tomon ikkita qisqa masofali ballistik raketalarni uchirgan.

Shimoliy Koreya raketalarining sinovi 13-martda boshlangan Seul va Vashington qo‘shma mashg‘ulotlari fonida amalga oshirilmoqda. Pxenyan qo‘shma mashg‘ulotlarni o‘ziga qarshi “agressiv urushga tayyorgarlik” deb baholagan.

Mart oyi boshida Shimoliy Koreya yetakchisining singlisi Kim Yo Chjon agar AQSH Shimoliy Koreyaning Tinch okeanida sinovdan o‘tkazadigan qit’alararo raketasini urib tushirishga urinsa, Pxenyan buni urush e’lon qilinishi deb baholashini aytgandi. Shuningdek, Shimoliy Koreya tashqi ishlar vazirining xalqaro tashkilot bo‘yicha o‘rinbosari Kim Son Gen BMTni AQSH va Janubiy Koreyadan qo‘shma harbiy mashg‘ulotlarni to‘xtatishni talab qilishga chaqirgan.