Америка маъмурияти 17 октябрь куни Украинага навбатдаги ҳарбий ёрдам пакетини эълон қилади. АҚШ президенти Жо Байден украиналик ҳамкасби Владимир Зеленский билан телефон орқали мулоқот қилиши режалаштирилган. Бу ҳақда Оқ уй матбуот котиби Карин Жан-Пьер журналистлар учун навбатдаги брифингда маълум қилди.
“Президент Байден яқин орада Владимир Зеленский билан телефон орқали гаплашади ва Украинага хавфсизлик соҳасида муҳим янги ёрдам пакетини эълон қилади”, деди у.
Жан-Пьернинг қўшимча қилишича, ноябрь ойида Германиянинг Рамштейн авиабазасида Киевга қурол етказиб беришни мувофиқлаштириш бўйича давлат ва ҳукумат раҳбарлари даражасидаги алоқа гуруҳининг йиғилиши бўлиб ўтади.
Матбуот котибининг айтишича, Байден Германияга бўлажак сафарида Зеленский билан учрашмайди. “Байден Европада бўлганида улар учрашиш имконига эга бўлмайди. Шу сабабли Байден Зеленский билан олдиндан телефон орқали мулоқот қилишга қарор қилди”, деди у.
Жан-Пьер, шунингдек, АҚШ президенти Германияга ташрифи чоғида бошқа хорижий етакчилар билан учрашиши кутилаётганини эслатиб ўтган.
8 октябрь куни Байден АҚШга яқинлашиб келаётган “Милтон” тўфони сабабли Германияга сафарини кейинга қолдиришга қарор қилганди.
Изоҳ (0)