AQSH prezidenti Jo Bayden va Ukraina prezidenti Vladimir Zelenskiy Oq uyda uchrashdi. Uchrashuvda Bayden Ukrainani qo‘llab-quvvatlash uchun 8 milliard dollar ajratilishini ma’lum qildi.
Bayden Pentagonga bu mablag‘ni o‘z muddati tugaguncha ajratishni topshirdi. U, shuningdek, Ukraina armiyasiga harbiy texnikaning navbatdagi partiyasi yuborilishini ham ma’lum qildi.
“Mudofaa vazirligi Xavfsizlik bo‘yicha yordam tashabbusi orqali Ukrainaga qo‘shimcha havo mudofaa vositalari, uchuvchisiz samolyotlar va havodan yerga o‘q-dorilarni o‘z ichiga olgan 2,4 milliard dollarlik yordamni eʼlon qildi”, deyiladi Oq uy veb-saytida.
AQSH prezidenti uzoq masofali JSOW o‘q-dorilari, Patriot havo mudofaa tizimlari va ular uchun o‘q-dorilar Ukrainaga yetkazilishini ma’lum qilgan. U, shuningdek, ukrainalik uchuvchilarni F-16 qiruvchi samolyotlarida o‘qitish dasturi kengaytirilishini aytgan.
Qo‘shma Shtatlar 25-sentyabr kuni Ukrainaga 375 million dollarlik harbiy yordam paketi ajratgani xabar qilingan edi, u bombalar, HIMARS o‘q-dorilari, Javelin raketalari, MRAP zirhli mashinalari, patrul katerlari, o‘q otish qurollari va tankka qarshi qurollarni o‘z ichiga olgan.
Izoh (0)