Rejissyor Pablo Larrainning “Mariya” filmi 2024-yilning asosiy premyeralaridan biri bo‘ldi. Filmda bosh rolda Anjelina Joli 20-asrning eng buyuk opera xonandalaridan biri Mariya Kallas obrazini gavdalantirdi. Undagi voqealar 1970-yillarda Parijda, Kallas karyerasining so‘nggi yillarida bo‘lib o‘tadi. Film haqida kino tanqidchilar va muxlislar ham ijobiy, ham salbiy fikrlar bildirdi. Biz sizni ushbu muhokamaga qo‘shilishga taklif qilamiz va Anjelina Joli ishtirokidagi eng sara biografik filmlarni yodga olamiz.
“Jia” (1998)
1970-yillarning eng mashhur moda olami namoyondasi haqidagi film Anjelina Joli filmografiyasidagi birinchi yirik muvaffaqiyatli loyihaga aylandi. Film modelning shaxsiy kundaligiga asoslangan bo‘lib, uning qisqa, ammo yorqin umri haqida hikoya qilinadi. Jia ismli qahramon hayoti haqiqatan ham g‘alati va ba’zida dahshatli voqealarga to‘la edi: yoshligida otasi uchun idish yuvuvchi bo‘lib ishlagan qiz bir zumda dunyoga mashhur supermodelga aylanadi.
U yirik moda uylari — Armani, Dior, Versace va Yves Saint Laurent kabi eng yaxshi brendlar bilan hamkorlik qiladi. Biroq go‘zallik va boylik Jiaga baxt olib kelmaydi: model shaxsiy hayotida juda yolg‘iz va baxtsiz bo‘ladi.
Joli uzoq vaqt davomida roldan voz kechganini tan oldi, chunki uning qahramon bilan ko‘p umumiy jihatlar bo‘lgan — aktrisaning o‘zi ham bir vaqtlar giyohvand moddalar iste’molidan keyin kasal bo‘lgan. Shunga qaramay, Jia obrazi amerikalik aktrisaning barcha iste’dodini ochib berdi va Anjelina jiddiy dramatik aktrisa sifatida mashhur bo‘ldi. Mazkur rol unga “Oltin globus” olib keldi.
“Almashtirilgan bola” (2008)
61-Kann kinofestivalida premyerasi bo‘lib o‘tgan Klint Isvud rejissyorligidagi trillerda Joli to‘qqiz yoshar Uolter ismli o‘g‘lini yo‘qotib qo‘ygan Kristin Kollinz obrazini ijro etdi.
Filmdagi voqealar 1920-yillarning oxirida Los-Anjelesda bo‘lib o‘tadi va o‘g‘irlab ketilganidan keyin politsiya tomonidan onaga qaytarilgan bola uning o‘g‘li emasligini anglab etgan ayolning hikoyasiga asoslanadi. Ona farzandini qidirishni qayta boshlashdan umidvor bo‘lib, jurnalistlarga murojaat qiladi, ammo bu hukumatga yoqmaydi va uni aqldan ozgan deb e’lon qilinadi. Shu paytdan boshlab Kollinzning shafqatsiz tizim bilan kurashuvi boshlanadi, chunki AQSH dagi politsiya tizimi o‘z ishining samaradorligiga shubha qiladiganlarga toqat qilmas edi.
Rejissyor Istvudning aytishicha, Joli ona bo‘lgani va o‘sha davr qahramoni uchun tashqi jihatdan juda mos ekanligi uchun aynan shu aktrisani tanlagan. Filmni suratga olish paytida Anjelina ko‘p farzandli ona edi. Uning uch nafar asrab olingan va bitta biologik farzandi — qizi Shaylo bor edi. Film premyerasi bo‘lib o‘tgan yilda Joli yana bir bora ona bo‘ldi va egizaklari — Noks va Vivyenni dunyoga keltirdi. Bu rol Joliga “Oskar”ga nomzodi qo‘yilishiga sabab bo‘ldi.
“Mariya” (2024)
Biografik filmlar suratga olish bo‘yicha o‘z ishining ustasi Pablo Larrain ekranga yana bir ayol haqidagi hikoyasini olib chiqdi. Bu safar rejissyor XX asrning eng buyuk opera xonandalaridan biri Mariya Kallasning Parijda o‘tgan so‘nggi yillarini kadrga muhrladi.
Tanqidchilar filmni a’lo darajada baholamagan bo‘lsa-da, Venetsiya kinofestivalidagi premyerada tomoshabinlar filmni sakkiz daqiqalik olqishlar bilan kutib olgan va Anjelina Joli ko‘z yoshlarini yashira olmagan.
“Fikrimcha, Kallas hech kimga ozor bermaydigan, mehnatkash va oqila ayol bo‘lgan”, — deydi Joli o‘zining qahramoni haqida.
Filmda Kallas ovozidan fonogramma orqali foydalangan, ammo bir nechta sahnalarda Jolining o‘zi ham opera kuylagan. Buning uchun aktrisa yetti oy davomida opera qo‘shiqchiligi bo‘yicha tahsil oldi, vokal texnikasi, italyan tili, suratga olishda qadni qanday tutish va nafas olish qoidalarini o‘rgandi.
Aktrisa birinchi marta qo‘shiq kuylaganida juda asabiylashgan, shuning uchun repetitsiya paytida xonaga hech kim kira olmasligi uchun aktrisaning o‘g‘illari xona eshiklarini qulflab qo‘yishgan.
Izoh (0)