Taniqli amerikalik aktrisa Anjelina Joli AQSHdagi hayoti va Gollivuddagi ishidan nolidi. Aktrisa qayerga ko‘chib o‘tishni rejalashtirayotganini oshkor qildi.
Joli butun umrini Los-Anjelesda o‘tkazdi. Biroq aktrisaning aytishicha, endi u bu yerda yashay olmaydi. Gap shundaki, uning shaxsiy hayoti tobora ommalashib bormoqda va unga bunday yashash qiyin — Gollivudda aytilgan har qanday so‘z unga qarshi ishlatilishi mumkin.
Yulduz The Hollywood Reporter nashriga bergan intervyusida aytishicha, 6 nafar farzandi voyaga yetgach, u Kambojaga ko‘chib o‘tmoqchi. 2005-yilda u ushbu mamlakat fuqaroligini olgan — uning asrab olgan o‘g‘li kambojalik.
Ma’lumki, Joli karyerasida 5 yil tanaffus olgandi. Uning so‘zlariga ko‘ra, bu bolalarni tarbiyalash uchun majburiy qaror edi. Yaqinda aktrisa “Mariya” filmida bosh rolni o‘ynadi. Farzandlari ulg‘aygan, endi ular onalari bilan suratga olish maydonchasida vaqt o‘tkazishlari, xizmat safarlariga borishlari mumkin.
“Farzandlarim ulg‘ayib, mustaqil bo‘lib bormoqda. Ular menga kamroq muhtoj va xohlagan vaqtlarida ketishlari mumkin. Bu bizning hayotimizda yangi davr. Men bundan juda xursandman. Hozir ajrashayotganim sababli Los Anjelesda bo‘lishga majburman, lekin bolalarim 18 yoshga to‘lishi bilanoq bu yerdan ketishim mumkin. Ko‘proq vaqtimni Kambojada o‘tkazmoqchiman, lekin bolalarim dunyoning qaysi burchagida bo‘lmasin, ularni ko‘rishga borib turaman”, deydi yulduz.
Bundan tashqari, Joli karyerasi qanday boshlanganini eslab, oilasidagi og‘ir moliyaviy ahvol uni aktrisa bo‘lishga majbur qilganini tan oldi. O‘shanda u jahon miqyosidagi yulduzga aylanishini xayoliga ham keltirmagan.
“Men onamga to‘lovlarni to‘lashda yordam berish uchun aktrisa bo‘lganman. Aktrisa bo‘lish menga juda yoqqan paytlar bo‘lgan, lekin shunday vaqtlar ham bo‘lganki, shou-biznesda o‘zimni qulay his qilmaganman. Umid qilamanki, Gollivud bilan yangi munosabatlar o‘rnata olaman”, deydi Joli.
Izoh (0)