Namangan viloyatining Kosonsoy tumanida haydovchi 9 o‘rinli avtomobilga 25 nafardan oshiq bolani mindirib harakatlangani aniqlandi. Bu haqda viloyat IIB Yo‘l harakati xavfsizligi boshqarmasi matbuot xizmati xabar berdi.
Maʼlum qilinishicha, Kosonsoy tumanida xizmat faoliyatini olib borayotgan YPX xodimi harakatlanib ketayotgan Hyundai Starex rusumli avtomashinani to‘xtatib tekshirgan. Avtomobil salonida bo‘lgan bolalar sanab ko‘rilganda, ularning soni 25 nafardan oshiqligi, haydovchining esa tegishli hujjatlari yo‘qligi aniqlangan va unga nisbatan maʼmuriy bayonnoma rasmiylashtirilgan.
Avvalroq Samarqand viloyatida Damas haydovchisi 15 nafar bola va ularning onalarini olib ketayotgani aniqlangani haqida xabar berilgandi.
2023-yil sentyabrda Buxoro viloyati G‘ijduvon tumanida bog‘cha mudirasi 25 nafar bolani o‘z Spark’ida olib ketayotganida to‘xtatilgandi. Bundan tashqari, Surxondaryoda ham haydovchi Damas’da 25 nafar bog‘cha bolasini olib ketayotgani ma’lum bo‘lgan edi.
Izoh (0)