Nursulton Ro‘ziboyevning navbatdagi raqibi Brayan Battl 16-avgustdan 17-avgustga o‘tar kechasi o‘tkaziladigan jangdan oldin o‘tkaziladigan tadbirlarning birida o‘zbekistonlik muxlislarni haqorat qildi. Bu haqda Euroasia nashri xabar berdi.
Har safar Instagram’ga kirganimda, yuzlab yangi izohlarni ko‘raman. Menimcha, O‘zbekistonda bo‘sh vaqtini bekor o‘tkazadigan juda ko‘p yigitlar bor. Instagram ularning tilini tarjima qila olmayapti, shuning uchun nima yozayotganini tushunmayman. Tarjima tugmasini bosaveraman, lekin baribir tarjima chiqmaydi. Faqat “Nursulton” degan yozuv, O‘zbekiston bayrog‘i va tarjima qilib bo‘lmaydigan bir nechta so‘zlar bor, shuning uchun nima deyishayotganini umuman bilmayman, — dedi UFC jangchisi.
Ma’lumot uchun, Ro‘ziboyev va Battl o‘rtasidagi bahs 17-avgust tongida (AQSH vaqti bilan 16-avgust) AQSHning Chikago shahrida bo‘lib o‘tadigan UFC 319 turniri doirasida bo‘lib o‘tadi.
30 yoshli Battl UFC’da 2021-yil 28-avgustdan beri faoliyat yuritib kelmoqda. Hozirgacha u promoushenda 7 ta g‘alaba, 1 ta mag‘lubiyat va 1 ta NC (jang o‘tkazilmagan) natijalarini qayd etgan. U so‘nggi jangini 2024-yil 7-dekabrda Rendi Braunga qarshi o‘tkazgan va hakamlarning yakdil qaroriga ko‘ra g‘alaba qozongan.
Ro‘ziboyev hozirga qadar faoliyati davomida 47 ta jang o‘tkazib, ulardan 36 tasida g‘alaba qozongan, 9 marta mag‘lub bo‘lgan va 2 marta durang qayd etgan. Brayan Battlga qarshi bahs Ro‘ziboyevning UFC’dagi oltinchi jangiga aylanadi. Bungacha u ushbu promoushenda 5 marotaba oktagonga ko‘tarilib, 4 ta g‘alaba va 1 ta mag‘lubiyat qayd etgan.
Izoh (0)