Bolalar nafaqasi va moddiy yordam tayinlashda bir necha talablar bor. Ijtimoiy himoya milliy agentligi nafaqalar tayinlash va to‘lovlarni amalga oshirishda vakolatli davlat organi hisoblanadi.
Asosiy talablar
Bolalar nafaqasi va moddiy yordam “Ijtimoiy himoya yagona reyestri” orqali kam taʼminlangan oilalarga tayinlanadi. Mazkur mablag‘larni olish uchun murojaatchining har bir oila aʼzosiga to‘g‘ri keladigan daromad minimal isteʼmol xarajatlari — 648 ming so‘mdan kam bo‘lishi lozim.
Bolalar nafaqasi va moddiy yordam tayinlashda arizachining mehnatga layoqatli oila aʼzolari band bo‘lishlari yoki mehnat organlariga murojaat qilgan bo‘lishlari kerak.
Shu bilan birga, talabgordan bittadan ko‘p ko‘chmas mulki, noturar ko‘chmas mulki, yangi avtomashinasi, bankda katta miqdordagi depozitlari va qimmatli qog‘ozlari bo‘lmasligi ham inobatga olinadi.
Yangi tartib
O‘zbekistonda 2024-yilning 1-mayidan boshlab my.gov.uz portali orqali bolalar nafaqasi yoki moddiy yordam uchun onlayn ariza berish imkoniyati yaratildi.
Bolalar nafaqasi yoki moddiy yordam olish uchun ariza berish, ularni ko‘rib chiqish, tayinlash va to‘lashning amaldagi tartibi saqlab qolingan holda yana bir qo‘shimcha tartib joriy etildi. Unga ko‘ra, endilikda arizachi mahalla fuqarolar yig‘iniga tashrif buyurib, “Inson” ijtimoiy xizmatlar markazi direktori nomiga ariza bilan murojaat qilishi mumkin. Umuman olganda, har ikkala usulda topshirilgan arizalar bir xil muddatda va bir xil mezonlar asosida ko‘rib chiqiladi.
Qancha to‘lanadi?
Hozirda bolalar nafaqasi miqdori oilada uch yoshgacha bo‘lgan bir bola uchun 325 000 so‘m. Eng birinchi farzand uch yoshdan katta bo‘lsa, unga 250 000 so‘m to‘lanadi. Keyingi ikkinchi farzandlarga ikki holatda ham 150 000 so‘mdan beriladi. Keyingi farzandlarning har biri uchun 100 000 so‘mdan qo‘shib ketilaveradi. Moddiy yordam miqdori esa oyiga 380 000 so‘m.
Oilalarda birinchisidan keyingi farzandlar tug‘ilish holatlari bor. Amaldagi tartibga binoan, yangi tug‘ilgan chaqaloq to‘g‘risidagi maʼlumotlar FHDY organining axborot tizimidan onlayn va avtomat tarzda olinadi. Yaʼni fuqarolar yangi farzandi tug‘ilgach, bolalar nafaqasini qayta hisoblash bo‘yicha murojaat qilmaydi. Bola tug‘ilgan sanadan maʼlumotlar avtomat ravishda dasturga keladi, keyingi oyning birinchi sanasidan pul miqdori yangi tug‘ilgan bolaga ham qo‘shilgan holda qayta hisoblab, oshirib boriladi.
Eslatib o‘tamiz, ijtimoiy to‘lovlar bilan bog‘liq barcha savollariga tuman yoki shaharlardagi “Inson” ijtimoiy xizmatlar markazlariga murojaat qilish mumkin.
Izoh (4)
Ас салому алейкум мани 3 нафар фарзандим бор ман Кыргызстан фукорасиман хожаёним Узбекистан фукораси 7йош 4йош 1йош
Izoh o‘chirildi
Assalomu alaykum meni 5 ta bolam bor 2 tasi maktabda 2 tasi boxchada o'zimni muntazam ishim yoq bolalar puli olish uchun qaysi saytga kiraman
Yangi avtomobilni yoshi nechada boʻlsa chiqmaydi
Nomida 1ta kochmas mulk harid qilganda bolalar nafaqasi beriladimi