Toshkentdagi maktabda dars payti o‘qituvchi va o‘quvchi o‘rtasida janjal yuz bergani haqida xabar berilgan edi. Holat aks etgan video ijtimoiy tarmoqlarda tarqalgan.
Maktabgacha va maktab taʼlimi vazirligi matbuot xizmatining xabar berishicha, holat bo‘yicha vazirlik tomonidan o‘rnatilgan tartibda o‘rganish ishlari, xususan, o‘quvchilarning ota-onalari, maktab rahbariyati vakillari, o‘qituvchilar va o‘quvchilar bilan muloqotlar va zarur tushuntirish ishlari olib borildi.
Yuzaga kelgan vaziyatga tegishli hujjatlar huquqiy baho berish uchun Bolalar masalalari bo‘yicha Chilonzor tumani komissiyasiga taqdim etildi.
Komissiyaning mazkur holat bo‘yicha o‘rganish xulosasi 28-fevral kuni eʼlon qilinishi rejalashtirilgan.
Avvalroq Chilonzor tuman hokimligi matbuot xizmati voqea maktabning 6-sinf o‘quvchilari matematika darsida sodir bo‘lgani haqida xabar bergandi. Bolalar o‘qituvchi Yu.Portnovaning gaplariga quloq solmagan va tartibni buzgan. O‘z navbatida o‘qituvchi ham jahlini jilovlay olmasdan o‘quvchini majburlab sinfdan chiqarib yuborgan. Bola sinfdan chiqmaslik uchun o‘qituvchiga qarshilik ko‘rsatgan.
Maktabda yuz bergan bu voqea yuzasidan ota-onalar majlisi chaqirildi va ularning xohishiga ko‘ra matematika o‘qituvchisi Yu.Portnova mazkur sinf o‘quvchilariga dars o‘tishdan chetlashtirildi.
Izoh (0)