Turkiyada zilzila bo‘lishini bashorat qilgan niderlandiyalik seysmolog Frank Xugerbits 2023-yilning mart oyida “megazilzila” kuzatilishini aytdi. SSGEOS ilmiy institutining YouTube kanalida uning bashorati aks etgan video paydo bo‘ldi.
Prognozga ko‘ra, 2 va 5-mart kunlari sayyoralarning kritik geometriyasining yaqinlashishi 3-4 mart yoki 6-7 mart kunlari juda katta seysmik faollikka olib kelishi mumkin. Seysmologlar silkinishlar sayyoraning 12 nuqtasida kuzatilib, ularning magnitudasi 8,5 ball va undan yuqori bo‘lishini ta’kidlamoqda.
“Bo‘rttirayotganim yo‘q, qo‘rqitmoqchi ham emasman. Bu shunchaki ogohlantirish, chunki sayyora geometriyasi katta seysmik hodisalarni keltirib chiqaradi”, — ta’kidladi Xugerbits.
Qizil zonaga kirgan hududlar ham sanab o‘tilgan: bular Yaponiyaning janubi, Indoneziya, Portugaliya, Gretsiya, Pokiston va Shimoliy Amerikaning bir qismi. Kuril orollarida ham zilzila sodir bo‘lishi prognoz qilingan.
6-fevral kuni Turkiyada 7,7 va 7,6 magnitudali ikkita zilzila qayd etildi. 23-fevral holatiga ko‘ra, tabiiy ofat qurbonlari soni 43,5 ming kishidan oshgan. Keyinroq 20-fevral kuni mamlakatda 6,4 va 5,8 magnitudali yangi zilzilalar sodir bo‘ldi va Hatay viloyatida vayronagarchiliklar qayd etildi. 27-fevral kuni esa Malatya viloyatida yana 5,6 magnitudali zilzila qayd etildi.
Izoh (0)