100 ming dollarlik ot, 50 mln so‘mga sotilmagan qo‘y: Namangandagi xalqaro ko‘rgazmadan reportaj (video)

Namanganda ilk bor zotdor hayvon va parrandalarning xalqaro ko‘rgazmasi bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.

Ko‘rgazmada O‘zbekistonning turli viloyatlari hamda yaqin xorijdan kelgan fermer va shaxsiy xo‘jalik egalari 1000 dan ortiq ot, tuya, novvos, echki, quyon, tuyaqush, tovus, tovuq va bedanalar bilan ishtirok etdi. Ular uchun Yangi Namangan tumanidagi “Yoshlik baraka” bozoridan alohida joy ajratib berildi.

“Bu yerga Butsefal laqabli zotli otimizni olib keldik. Uni Polshada 80 ming dollarga xarid qilgandik. Hozirgi narxi 100 ming dollardan kam emas. Uni asta-sekin uloq chopishga tayyorlayapmiz, yaqin orada biz kutgan natijalarni ko‘rsatsa ajab emas”, — deydi To‘raqo‘rg‘on tumanidagi “Dengiz tulpori” fermer xo‘jaligi vakili Nodirbek Abdurashidov.

Ko‘rgazmada bu kabi qimmatbaho jonivorlar ko‘p edi. Jumladan, Yangiqo‘rg‘on tumanidan keltirilgan 1,5 tonnali Simmental zotli novvos 15 ming dollarga baholangan bo‘lsa, 200 kilogrammdan ortiq vaznga ega Arashan zotli qo‘y 50 million so‘mga ham sotilmadi.

“Tadbirda fermer xo‘jaligimizda boqilayotgan zotli tuyalar bilan ishtirok etyapmiz. 80 dan ortiq tuyalarimiz bor, ularni asosan turli kasalliklarga shifo sifatida ko‘riladigan suti uchun parvarishlaymiz. Bu sutga talab juda yuqori, shuncha tuyamiz bilan ham ehtiyojni qondirishimiz qiyin bo‘lyapti”, — deydi “Obid tuyachilik” fermer xo‘jaligi rahbari Abdurashid Yoqubboyev.

Ko‘rgazmada Toshkent viloyatining Zangiota tumanidan “Bolakay” fermer xo‘jaligi vakillari ham zotli echkilari bilan ishtirok etdi. Qiziq tomoni, 5-6 litr atrofida sut beradigan mazkur zotli echkilardan biri shu yerda egizakli bo‘ldi.

“Bugungi tadbir biz uchun barakali bo‘ldi. Avstriyadan olib kelingan 6 ta zotli echki bilan qatnashgandik, shu yerning o‘zida ularning soni 8 taga yetdi. Echkilardan birini Namanganga sovg‘a qilmoqchimiz”, — deydi fermer xo‘jaligi rahbari Qudratulla Fayzullayev.

Ko‘rgazma yakunida uning eng faol ishtirokchilari 10 million so‘mdan 30 million so‘mgacha bo‘lgan pul mukofotlari va esdalik sovg‘alari bilan taqdirlandi. Tadbirga qiziqish kutilganidan ziyoda bo‘lgani bois tashkilotchilar kelgusida uning davomiyligini uzaytirishni rejalashtirmoqda.