Қозоғистон Хитой билан табиий газ экспортини кенгайтириш бўйича музокаралар олиб бормоқда ва етказиб бериш ҳажмини ошириш учун янги трансчегаравий газ қувурини қуриш имкониятини кўриб чиқаётгани ҳақида Bloomberg хабар беради.
Қозоғистон Хитойнинг энергия ресурсларига бўлган талабини қондириш учун қўшни давлатлар, жумладан, Туркманистон ва Россия билан рақобатлашишига тўғри келади.
Россия Европа газ бозорининг муҳим улушини йўқотгач, Хитой Марказий Осиё экспортчилари учун асосий муқобил бозорга айланди. Хитойда иқтисодий ўсиш суръати пасайганига қарамай, табиий газга бўлган талаб барқарорлигича қолмоқда ва бу Қозоғистон учун янги имкониятлар яратади.
“Хитойда иқтисодий пасайиш ҳақидаги хабарларга қарамай, газга талаб ортиб бормоқда”, деди миллий газ оператори “КазакГаз” ОАЖ бош директори Санжар Жаркешов.
“Биз Хитойга, шу жумладан, Ўзбекистон каби бошқа мамлакатларга ҳам экспорт ҳажмини ошириш бўйича консенсусга эришамиз деган умиддамиз”, қўшимча қилди у.
Расмийнинг сўзларига кўра, Хитой билан музокаралар жуда катта ҳажмдаги газни экспорт қилиш бўйича кетмоқда. Мазкур ҳажм Қозоғистон экспортининг ҳозирги даражасидан анчайин юқори экани қайд этилди.
Изоҳ (0)