Sharqiy Osiyo ayollari hatto yoshi 50 dan oshganda ham juda go‘zal va yosh ko‘rinishi bilan ajralib turadi. Bularning bariga sabab genetika va yashash iqlimi deb aytishingiz mumkin, qisman bu haqiqat. Biroq tiniq yuz terisi, yuzning chiroyli oval shakli va ajinlarning kamligi xitoy ayollarining kundalik yashash tarzi va yuz parvarishi bilan bog‘liq. Bunday sog‘lom odatlarni shakllantirish orqali ko‘p yillar davomida yosh ko‘rinishni saqlab qolish mumkin.
Quyoshdan himoyalovchi vositalar
Quyoshda uzoq qolish teriga zararli bo‘lib, erta qarishni, yuzda dog‘lar paydo bo‘lishini va ba’zan saratonni keltirib chiqaradi. Xitoylik ayollar bu masalaga ehtiyotkorlik bilan yondashadi: quyoshda ular doimo himoya kiyimlari, qalpoq va shlyapalar kiyadi, ultrabinafsha nurlanishidan himoya qiluvchi maxsus kremlardan foydalanishadi.
Yuz ifodasi va mimikani nazorat qilish
Xitoylik ayollar mentalitetining o‘ziga xos xususiyatlaridan kelib chiqib, bolalikdan his-tuyg‘ularini tiyishga o‘rgangan. Shu sababli ularning yuziga ajinlari kam tushadi.
Tarkibi tabiiy bo‘lgan kosmetika vositalari
Xitoyda yuz terisi parvarishida tabiiy va sifatli kosmetikadan foydalaniladi. Masalan, ayollar har kuni ertalab guruchli suv bilan yuzlarini yuvadi. Chunki guruchli suv yog‘li teri uchun mos keluvchi antioksidant, aminokislota va vitaminlar mavjud.
Doimiy dengiz o‘tlari va ko‘k choy iste’mol qilish
Xitoyliklar taomnomasidagi dengiz o‘tlari xuddi bizning an’anaviy kartoshkadek odatiy mahsulot hisoblanadi. Yashil dengiz o‘tlari xlorofill moddasi va antioksidantlarga boy bo‘lib, oksidlanish va teri qarishi jarayonini sekinlashtiradi, teri hujayralarini himoya qiladi. Bundan tashqari, dengiz o‘tlari toksinlarni yo‘q qiladi va terining yangilanishiga yordam beradigan yod, sink, kaltsiy va magniy kabi minerallarga boy.
Xitoyda mashhur ko‘k choy antioksidantlarga boy bo‘lib, to‘qimalardan ortiqcha suyuqlikni chiqarib yuboradi. Yashil choy ekstraktidan ishlab chiqarilgan kosmetika kollagen ishlab chiqarishni rag‘batlantiradi va teri elastikligini oshiradi.
Yuz massaji va akupunktura
Xitoy mahalliy aholisi maxsus massajga bormasalar ham uy sharoitida yuz massajini kundalik odatga aylantirgan. Yuzni uqalash shishdan xalos bo‘lishga, mayda ajinlarni tekislashga, yuz rangini yaxshilashga yordam beradi.
Akupunktura — igna bilan davolash esa Xitoy va barcha Sharqiy Osiyo davlatlarida qadimdan mavjud bo‘lgan muolaja hisoblanadi. Biologik faol nuqtalarga igna sanchish qon aylanishini va moddalar almashinuvini yaxshilaydi, terida tabiiy kollagen ishlab chiqarilishini rag‘batlantiradi va to‘qimalar atrofiyasini oldini oladi.
Akupunkturani uy sharoitida bajarish xavfli hisoblanadi. Igna bilan davolash muolajasini faqat maxsus klinika yoki sertifikatga ega go‘zallik salonlarida amalga oshiriladi.
Izoh (0)