Xitoy sharqidagi Shandun provinsiyasi qirg‘og‘ida noma’lum uchar jism aniqlandi. Bu haqda Global Times xabar berdi.
Ma’lum qilinishicha, Xitoyning “tegishli idoralari” uni urib tushirgan bo‘lishi mumkin. Qirg‘oqdagi baliqchilarga noma’lum obyekt haqida ogohlantirish yuborilgan. Unda noma’lum uchar jism “urib tushirishga tayyorlanayotgani” ta’kidlangan.
Shu sababli mahalliy baliqchilardan “xavfsizlik qoidalariga rioya qilish”, shuningdek, noma’lum jism baliqchilar qayig‘i yaqiniga tushib qolgan taqdirda ularni suratga olish so‘ralgan. Ayni damda gap qanday noma’lum uchar obyekt haqida ketayotgani haqida rasmiy ma’lumot yo‘q.
.jpg)
Avvalroq AQSH harbiylari mamlakat osmonidagi uchib yurgan razvedkachi havo sharini kuzatgandi. Harbiylar havo sharini urib tushirish niyatida emasligi, chunki u fuqaro aviatsiyasi uchun xavf tug‘dirmasligini ma’lum qilgan. Amerika rasmiylari holat yuzasidan Xitoy hukumati bilan “Vashington va Pekindagi bir nechta kanallar orqali” aloqaga chiqqan.
Xitoy AQSH osmonidagi “razvedkachi havo shari” ularga tegishli ekanini ma’lum qilgan. Shundan so‘ng AQSH Shimoliy qo‘mondonligining qiruvchi samolyotlari Xitoy sharini urib tushirgan. Xitoy Tashqi ishlar vazirligi “AQSHning fuqarolik uchuvchisiz uchar sharga hujum uchun kuch ishlatganidan” norozilik bildirgan.
Hodisadan bir hafta o‘tib, 11-fevral oqshomida Shimoliy Amerika aerokosmik mudofaa birlashgan qo‘mondonligi Kanada havo hududida noma’lum uchar apparatni urib tushirdi. Obyekt AQSH—Kanada chegarasidan taxminan 160 kilometr uzoqlikka tushgan.
Izoh (0)