“Daryo” muxbiri Mozori Sharifda o‘tkazilgan afg‘on ayollarining ko‘rgazmasida ishtirok etib, u yerdagi qator ishtirokchilar, sotuvchilar va davlat idoralari vakillaridan intervyu oldi.
Balx viloyati Savdo-sanoat palatasi rahbari Asadulla Asadiyning aytishicha, ushbu ko‘rgazma Xalqaro mehnat tashkiloti ko‘magida o‘tkazilgan va uni o‘tkazishdan maqsad Afg‘onistonda kichik biznesni, mahalliy mahsulotlarni qo‘llab-quvvatlash va marketingni joriy etishdir.
Ushbu ko‘rgazmada 130 stendda mahalliy mahsulotlar va afg‘on ayollarining qo‘l san‘atlari namoyish etildi.
Ko‘rgazmada ishtirok etgan xotin-qizlar Afg‘onistonning mahalliy mahsulotlari bilan aholini yaqindan tanishtirish, xotin-qizlarning iqtisodiy faolligini kuchaytirishda bunday dasturlarning o‘rni katta deb hisoblashini ma’lum qilgan.
Ko‘rgazma ishtirokchisi Shabnam ismli ayol “Daryo” muxbiri bilan suhbatda O‘zbekiston, Tojikiston va Qozog‘istondan Afg‘onistonga eng sifatli baxmal buyumlar import qilinishini aytib o‘tdi.
Ba’zi sanoatchilar shunga o‘xshash tovarlar importi va sayohat vizasi cheklovlari, shuningdek, xomashyo sohasidagi muammolar ishdagi asosiy muammolar ekanligini ma’lum qilgan.
Balx viloyati maʼmuriy islohotlar rahbarining “Daryo” muxbiriga taʼkidlashicha, butun Afg‘onistonda xavfsizlik taʼminlangan va qo‘shni davlatlar tadbirkorlari Afg‘onistonga borib, turli sohalarga sarmoya kiritishlari mumkin.
Mozori Sharifga kelib, ushbu ko‘rgazmada ishtirok etgan tataristonlik tadbirkorlardan biri Ilyos “Daryo” muxbiri bilan suhbatda Afg‘oniston haqida internetda o‘qigan va eshitganlari butunlay boshqacha ekanini, Afg‘onistonda xavfsizlik bo‘yicha hech qanday muammo sezmayotganini, afg‘onlarning mehmondo‘stligidan mamnunligini aytdi.
“Tolibon” Sanoat va savdo vazirligining ko‘rgazmalarini tashkil etish bilan shug‘ullanuvchi xodim Muhammad Abid o‘z-o‘zini ta’minlash uchun mahalliy mahsulotlardan foydalanishga urg‘u berib, joriy yilda 50 ta mahalliy va xorijiy ko‘rgazmalar tashkil etish rejalashtirilganini aytib o‘tdi.
Izoh (0)