Qirg‘izistonda Afg‘onistondan keladigan anor ekstraktli gazli ichimlik vositasini sotish taqiqlandi. Bu haqda O‘sh shahri hokimligi tarqatgan xabarga asoslanib Tengrinews manbasi xabar berdi.
Manbada aytilishicha, Afg‘onistondan import qilinadigan Golden life (“Золотая жизнь“) gazli ichimligi Qirg‘izistonning O‘sh shahridagi savdo nuqtalaridan butunlay yig‘ishtirib olingan. Mamlakatning boshqa hududlarida ham bu ichimlikni savdodan olib qo‘yish bo‘yicha ishlar davom ettirilmoqda.
“Tadbir Qirg‘iziston Sog‘liqni saqlash vazirligi huzuridagi kasalliklarni oldini olish va davlat sanitariya-epidemiologiya nazorati departamenti buyrug‘iga asosan olib borilmoqda”, — deyiladi O‘sh hokimligi matbuot xizmati bayonotida.
Ushbu ichimlikka taqiq qo‘yilishiga o‘ziga xos sabab bor. Laboratoriya o‘rganishlari natijalariga ko‘ra, Golden life ichimligi E122 Azorubin kimyoviy bo‘yog‘ini o‘z ichiga oladi. Ushbu ingrediyent esa bolalarning faolligi va diqqat-eʼtiboriga salbiy taʼsir ko‘rsatishi mumkin.
Viloyat hokimliklari xorijdan mahsulot olib keluvchi tijorat kompaniyalari mahsulotlarning salbiy taʼsiridan ogohlantirgan. Tegishli sifat ko‘rsatkichi va laboratoriya tahlili bo‘lmagan vositalarni mamlakat hududiga kiritmaslik buyurilgan.
“Chakana savdo tarmoqlari rahbarlariga ham ushbu mahsulotlarni sotishni taqiqlash to‘g‘risida buyruq berildi”, — deyilgan Qirg‘iziston Sog‘liqni saqlash vazirligi xabarida.
Maʼlumot o‘rnida, Golden life ichimligi Qirg‘izistondan tashqari Markaziy Osiyoning Qozog‘iston, O‘zbekiston va Tojikiston kabi davlatlarida ham sotiladi. Afg‘onistonda ishlab chiqarilgan ichimlik Qozog‘istonda ham sotiladi.
Izoh (0)