“Hizbulloh” Isroilga dronlar bilan hujum qildi

Livanning “Hizbulloh” guruhi chegara bo‘ylab Isroilning 19 ta pozitsiyasiga hujum qildi. Bu haqda Reuters xabar berdi.

Ma’lum qilinishicha, pozitsiyalar harbiy obyektlarni o‘z ichiga oladi, ularga dronlar bilan zarba berilgan. Ijtimoiy tarmoqlarda hujum natijasida yong‘in kelib chiqqani aks etgan kadrlar tarqalgan.

Isroil armiyasi X ijtimoiy media platformasidagi postida Isroilga bir qator raketa hujumlaridan so‘ng Livandagi “Hizbulloh”ning bir qator nishonlariga zarba berganini ta’kidlagan.

Livan milliy axborot agentligiga ko‘ra, Isroil snaryadlari janubiy chegaradagi turli hududlarga tushgan. “Hizbulloh” o‘z bayonotida Livan-Isroil chegarasidagi bahsli Shebaa fermalari hududida Isroil armiyasi qo‘mondonlik punktiga hujum qilish uchun portlovchi moddalar o‘rnatilgan ikkita drondan foydalanganini aytgan.

Hizbullohning aytishicha, “katta miqdorda portlovchi moddalar” yuklangan dronlar Shebaa fermasi hududidagi Isroil batalon qarorgohiga hujum qilgan va ularning nishonlarini urgan.