Eronlik reper Tumaj Solihiy (Toomaj Salehi) 2022-yilning kuzida mamlakatda bo‘lib o‘tgan norozilik namoyishlarida qatnashgani uchun Islom respublikasi sudi tomonidan olti yil uch oy qamoq jazosiga hukm qilindi. Bu haqda Al Jazeera telekanali xabar berdi.
Hukm 10-iyul kuni chiqarilgan. Sud ma’lumotlariga ko‘ra, Solihiy 22 yoshli Mahsa Aminiyning o‘limidan so‘ng boshlangan hukumatga qarshi namoyishlarda faol ishtirok etgan.
O‘tgan yilning oktabr oyida hibsga olingan 33 yoshli reper internetda keng tarqalgan qo‘shiq va kliplarda Eron hukumatini tanqid qilgan.
Musiqachi hibsga olinganidan so‘ng davlat OAVlari uning ko‘zlari bog‘langan holda o‘z so‘zlari uchun kechirim so‘ragani aks etgan videoni tarqatdi.
Kurdiston viloyatidan bo‘lgan Mahsa Aminiy 13-sentabr kuni Tehron axloq politsiyasi tomonidan hijobini noto‘g‘ri o‘rashda ayblanib hibsga olinganidan ko‘p o‘tmay vafot etgandi. Guvohlar xavfsizlik kuchlarini qizni kaltaklaganlikda aybladi. Politsiya Aminiyning o‘limi baxtsiz hodisa ekanini aytdi.
17-sentabr kuni qizning dafn marosimidan so‘ng u tug‘ilib o‘sgan Sakez shahrida norozilik namoyishlari boshlanib, keyinchalik Islom respublikasining barcha yirik shaharlariga tarqaldi. Noroziliklar butun kuz davom etdi.
Jami 20 mingga yaqin eronlik hukumatga qarshi namoyishlarda qatnashgani uchun hibsga olindi. Keyinchalik yopiq sudlarda yetti kishi o‘limga hukm qilindi.
Izoh (0)