Kolumbiyalik xonanda Shakira soliq to‘lashdan bo‘yin tovlash ishi bo‘yicha aybdor ekanligini tan olib, 3 yil shartli muddat va 7 million yevro jarima to‘lash jazosiga rozi bo‘ldi. Xonanda prokuratura bilan kelishuvga erishgach, sud ishi to‘xtatilgan.

Gap shundaki, Ispaniya hukumati Shakirani 2012-yildan 2014-yilgacha bo‘lgan vaqt mobaynida 14,5 million yevro miqdoridagi daromad solig‘ini to‘lamaganlikda ayblagan. Shakira aybdor deb topilgan holatda 8 yilgacha qamoq jazosini olishi yoki 26 million yevro jarima to‘lashi mumkin edi. Shakira Isabel Muborak Ripoll 20-noyabr kuni sud majlisida shaxsan ishtirok etib, aybdor ekanligini tan olgan.

Maʼlumotlarga ko‘ra, xonandaning bunday qadam tashlashiga farzandlari sababchi bo‘lgan. “Men bu kurashda onalari o‘z xotirjamligini yo‘qotishini istamagan farzandlarimning manfaatlaridan kelib chiqib ushbu masalani tezroq hal qildim. Ijodiy faoliyatim davomida hamisha to‘g‘ri yo‘l tutishga va boshqalarga ijobiy namuna ko‘rsatishga intilganman. Bu moliyaviy qarorlarimga ham tegishli, har doim soliq masalasida dunyoning eng yaxshi maslahatchilariga murojaat qilganman. Shunga qaramasdan, Ispaniyaning soliq organlari ko‘plab professional sportchilar va boshqa taniqli shaxslar qatorida menga nisbatan ham ish ochishdi, yillar davomida quvvat, vaqt va asablarimizni yo‘qotishga majbur qilishdi.

Qarshimda ikkita yo‘l bor edi: oxirigacha kurashib, ruhiy xotirjamligim, farzandlarimning xotirjamligini xavf ostida qoldirish, qo‘shiqlar, albomlar ustida ishlash va gastrollarni to‘xtatish yoki hayotimning ushbu sahifasini yopib, uni o‘tmishda qoldirish”, – deydi ijodkor.

Xonandaning aytishicha, advokatlar ishni yutib chiqishlariga ishonishgan, shunga qaramasdan Shakira qatʼiy qaror qabul qilib, besh yildan buyon davom etib kelayotgan mavzuga nuqta qo‘ygan.