24-avgust kuni Toshkent shahridagi “Imom Termiziy” jome masjidi imom-xatibi Is’hoqjon Begmatovning soliqlar va keshbek ilovalaridan foydalanish to‘g‘risidagi qilgan chiqishi keskin munozaralarga sabab bo‘ldi. O‘zbekiston musulmonlari idorasi buni o‘zboshimchalik bilan qilingan chiqish deb atab, uning xatti-harakati ko‘rib chiqilishini e’lon qildi.
Qayd etilishicha, uning chiqishida savdo bilan shug‘ullanganlik uchun soliq to‘lash, kassa apparati ishlatish va keshbek ilovalarini joriy etish haqidagi chiqishiga haqli eʼtirozlar bildirildi.
“Taʼkidlash kerakki, Is’hoqjon Begmatovning mazkur qarashlari O‘zbekiston musulmonlari idorasi munosabatini mutlaqo ifoda etmaydi, balki uning o‘zboshimchalik ila aytgan shaxsiy fikridir”, — deyiladi Musulmonlar idorasi munosabatida.
O‘zbekiston musulmonlari idorasi Fatvo markazi tomonidan ushbu faoliyat turi batafsil o‘rganilib, keshbek kabi ilovalar orqali kelib tushadigan mablag‘, mukofot yoki bonus joizligi haqida avvallari ikki marta fatvo berilgan. Bunda g‘arar (aldov) va ribo aralashmasligi shart qilingan.
“Haqiqatan, soliq iqtisodiyot asoslaridan biri bo‘lib, ijtimoiy himoya, xayriya ishlari, bog‘cha, maktab, mudofaa kabi aholi uchun zarur obyektlarni moliyalashtirish, shuningdek, yo‘l, ko‘prik va shifoxona singari ko‘pchilikka muhim inshootlarni qurish hamda pensiya, nafaqalar soliq tushumlari hisobidan amalga oshiriladi.
Zero, soliqlar har bir zamon va makonda mavjud bo‘lgan. Islom dinida ixtiyoriy xayriyalarga hadya, sadaqa kabilar kirsa, majburiylari qatoriga zakot, ushr, fitr sadaqa, fidya va jizya kabilar kiradi. Islom tarixida ham mana shunday yig‘imlar hukumat ishlarini yuritish, yordamga muhtojlarni qo‘llab-quvvatlash, xavfsizlikni taʼminlash, ko‘prik va shu kabi insonlarga manfaat keltiradigan inshootlarni barpo etishga sarflangan”, — deyiladi xabarda.
Xabarda O‘zbekiston musulmonlari idorasi diniy soha xodimlarini qonunchilik talablariga hurmat bilan yondashishga muntazam chaqirishi, xalq manfaati va mamlakat taraqqiyotini ko‘zlab, amalga oshirilayotgan ijtimoiy-iqtisodiy islohotlarni doim qo‘llab-quvvatlashi bildirilgan.
O‘zbekiston musulmonlari idorasi tomonidan avval ijroga yo‘naltirilgan hujjatlarda imom-domlalar amaldagi qonunchilik talablariga rioya etishlari, mehnat majburiyatlariga amal qilishlari hamda munozaraga sabab bo‘luvchi chiqishlar qilmasliklari qatʼiy belgilab qo‘yilgan.
“Afsuski, Is’hoqjon Begmatov mazkur chiqishida meʼyoriy hujjatlar talablarini buzib, ushbu yo‘nalishdagi buyruqlar, ichki tartib qoidalar hamda mehnat majburiyatlariga amal qilmagani maʼlum bo‘ldi”, — deyiladi xabarda.
Yuqoridagilardan kelib chiqib, O‘zbekiston musulmonlari idorasi Ichki nazorat komissiyasi 25-avgust kuni Toshkent shahridagi “Imom Termiziy” jome masjidi imom-xatibi Is’hoqjon Begmatov xatti-harakatini ko‘rib chiqadi.
Izoh (0)