Bosh prokuratura huzuridagi Iqtisodiy jinoyatlarga qarshi kurashish departamenti va Toshkent shahar soliq boshqarmasi hamkorligida “Isteʼmolda bo‘lgan transport vositalari va ehtiyot qismlar Sergeli bozori” MCHJga qarashli savdo majmuasida profilaktik tadbir o‘tkazildi. Bu haqda Soliq qo‘mitasi matbuot xizmati xabar berdi.
Maʼlum qilinishicha, savdo markazida 1501 ta turg‘un savdo do‘konlari mavjud bo‘lib, o‘rganishlar natijasida tadbirkorlarning 16 nafari onlayn NKT o‘rnatmaganligi, 35 nafari yanvar oyida chek urmaganligi maʼlum bo‘lgan.
Shuningdek, ro‘yxatdan o‘tmasdan faoliyat ko‘rsatayotgan 130 ta fuqarodan 44 nafari yakka tartibdagi tadbirkor, 28 nafari yakka tartibdagi tadbirkorlarga yordamchi sifatida davlat ro‘yxatidan o‘tkazilgan hamda 58 tasi yuridik shaxslarga ishchi sifatida rasmiylashtirilgan.
Hamkorlikda olib borilgan 3 kunlik tadbir natijasida bozorning savdo tushumi jami 18,5 mlrd so‘mni tashkil qilib, yanvar oyi holatiga ko‘ra, savdo markazidagi tadbirkorlardan davlat budjetiga 2,3 mlrd so‘m soliq tushumi yo‘naltirilishi taʼminlangan.
Izoh (0)